Зрекрутуй ся до активных!

Iщы цілый тыжден єст, жебы надумати ся і записати до участи в черговій едициі проґраму Ґалицийской Фундациі Розвитку і Едикациі пн. «Активне село». Перша едиция проґраму прошла на зламі 2018/2019 років і взяли в ней участ молоды м.ін. зо Ждыні, Ґладышова, Новиці і Ріпок. Накручено фільм про Акцию Вісла.

То нагода для молодых люди, жебы заанґажувати ся в темы, котры сут важны для них, однайти штоси, чым будут занимати ся з захопліньом, познати новых камаратів та навчыти ся реалізувати своі, локальны проєкты – запрашат координаторка проґраму Бетка Пологова Вуйцік. То для них нагода, жебы наново одкрыти місцевости, в котрых жыют – додає.

«Активне село» то проґрам з обшыри громадяньской едукациі направленый на молодіж зо сел ґорлицкого повіту. Його участникы берут участ в циклю варштатів і стріч, в часі котрых вчат ся, як од початку до кінця зреалізувати свою думку, як заплянувати даку ініциятиву, беручы до увагы потребы свойой соспільности. Юстина Михаляк з Ґладышова з ентузиязмом оповідат о своій присутности на варштатах. Познала єм вельо новых осіб, навчыла єм ся орґанізувати розмаіте, аж і повело ся нам зорґанізувати стрічу з ґімнастичком і танцюристком з Ряшова. Барз рекомендую інчым взяти участ в другій едициі – захвалят.

17. марця т.р. в сельскій світлици в Ждыни прошла премєра документального фільму «Така была наша доля», якій зрыхтуваный был місцевом молодежом, а особливо Томком Болехом. Хотіл єм зробити дашто добре. Даде з пят років єм о тым думал, але все якоси не выходило, хыбаль мобілізациі не было – реляцийонувал для нашого порталю по показі фільму Фома Болех. «Активне село» таку мобілізацию дало. Окрем того інструкторы вчыли молодіж основ заряджаня проєктом, роботы в ансамбли люди, а тіж того, як дослідити обшыр, в котрій мешкают, як провірити, якы має проблемы і як мож ім зарадити.

Хочеме підперати молодіж в бытю активныма і одповідальныма членами своіх соспільности – деклярує координаторка Бетка Вуйцік. Віриме, што каждый може мати влияня на свою околицю, може ю зміняти, творити, чынити ліпшом. Стараме ся наново смотрити на місця, в котрых жыєме, і брати за них одповідальніст – стверджат.

Фільм «Така была наша доля» оповідат о І і ІІ світовых войнах, о святым Максимі, о першых Ватрах, о выселіню, о тым, што ся діяло з церквом в Конечній, сут в ним інтервю з Лемками старшого поколіня. Вельо річы єм ся навчыл – бесідує автор фільму. Аж і того, як зорґанізувати премєру фільму. Навчыл єм ся тіж того, же не треба ся піддавати. А додатково стрітил єм барз файных люди, котры тіж хтіли зробити штоси для свойой місцевости – кінчыт Фома Болех.

В рамках першой едициі повело ся окрем стрічы в танцюристком і накручыня фільму зорґанізувати музичны стрічы в Кобылянці, в результаці якых завязала ся ґрупа, в котрій молоды музикуют і взаімні вчат ся грати на інструментах. Прошол родинный роверовый райд по Низкым Бескіді, в Ґладышові зорґанізувано цикль подій звязаных з безпеком на дорозі, были іщы інчы стрічы дедикуваны молодежы.

Хто бы хотіл взяти участ в другій едициі, може ся приголосити. Участ є безплатна. Треба мати од 13 до 18 років і жыти на обшыри ґорлицкого повіту. Дрібниці глядайте в тым місци.

Фот. Ґалицийска Фундация Розвитку і Едикациі