Знова будуть обявльовати Полонины

Дістати „під скору“ пахы, смакы, фарбы, звыкы і гумор Полонин і їх жытелів і тот рік можете вдяка зажытковій події під назвов Обявте Полонины.

По минулорічнім пілотнім річнику, котрого цільом было помочі містным жытелям представити локалны традіції і спробовати собі службы в турістічнім русі, тот рік ся тота подія одбуде у восьмых селах Сниньского окресу почас вікенду од 13-го до 15-го авґуста 2021-го року.

Аґентуру TASR о тім інформовала Ева Коцанова з обчаньского здружіня Take naše, котре стоїть за проєктом. В минулім році на події брало участь майже 300 реґістрованых навщівників.

Як інформовала Коцанова, такый зажытковый вікенд є на Словакії унікатным концептом, бо на першый погляд то фестівал, но його атракції суть розсіяны по селах в цілій долині і навщівників так поводить по цілім сердці Народного парку Полонины.

Окремы зажыткы выдумали і на події зреалізують векшынов містны жытелі. Тот рік подія буде проходити в селах Стащін, Стащіньска Розтока, Тополя, Рунина, Уліч, Уліч Кривый, Збой і Новоселіця.

В рамках тогорічного проґраму нетрадічного фестівалу буде і коментована прогулька до праліса Рожок, участны навщівлять деревяны храмы, спознають войновы історії і містный фолклор, будуть і ґастрономічны варштаты на выробу татарчаных пирогів або варштаты традічных ремесел заміряных на тканя, роботу з деревом ці вівчов вовнов, але тішыти ся мож і на много далшого.

Як підкреслила Коцанова, в смыслі утримательности і підпоры містных жытелів іде аж 80 процент з ціны вступного окремым реалізаторам зажытків.

До проєкту Обявте Полонины залучіли ся і Справа Народного парку Полонины, Словацькый союз астрономів, Словацьке астрономічне общество при Словацькій академії наук, Областна орґанізація турістічного руху Вышній Земплін і Вышній Шаріш, Крайска орґанізація турістічного руху Северовыход Словакії, Фундація Словацького ґазового промыслу і верейноправне телерадіо RTVS.

Жрідло фотоґрафії: FB/Objavte Poloniny.