Жыґадло з Двурніком, Гасьором і інчыма

Автор образу «Деревце», ілюстраций до книжочок для діти з сериі «Баі Русинів і інчых народів», спілоснователь і спілтворця Діґітального Архіву Руской Бурсы та приятель Руской Бурсы, Анджей Жыґадло, находит ся серед артистів, творчіст якых презентувана є на найновшій выставі Музею Сучасной Штукы в Кракові пн. «ІІ світова война – драма, символ, травма».

Шіст образів входячых в склад «Освєнцімского Циклю» авторства Анджея Жыґадла мож видіти на експозициі про ІІ світову войну, котру орґанізує узнана не лем в Кракові інституция штукы – Музей Сучасной Штукы. Роботы Жыґадла презентуваны сут попри творчости такых слав польского малярства як Едвард Двурнік, Владислав Гасьор, Збіґнєв Лібера, Броніслав Лінке, Владислав Стжеміньскій ци Мария Ярема.

«ІІ світова война – драма, символ, травма»

На выставі презентуваны сут роботы 39 артистів. Творам штукы товаришат документы, пропаґандовы і літературны материялы. Експозиция поділена є на части. Найперше сут Сиґналы войны. Тот фраґмент має усвідомити, як легко мож заглушати остережыня. Пак є Sonderaktion Krakau, котре односит ся до арештувань парудесятьох краківскых професорів і вывезіня іх до концентрацийного табору в Заксенхаузен. Нацисты хотіли знищыти інтелектуальны і моральны авторитеты. Серед професорів был і Русин, Іван Гарайда.

Част Антисемітизм навязує до госел і афішів, якы розогняли антижыдівскы настроі. Жытя в ґетті то найтраґічнійшый образ чловечой еґзистенциі з часів войны. Барже драматичный як бытя в обозі, бо легше быти жертвом як досвідчати – абсолютні безсильно – траґедиі найблизшых. Сутьовом темом є Варшавскє Повстаня – контроверсийна подія отверта на історичны і емоцийны інтерпретациі. Найважнійшом з етичнного пункту пізріня є тема Екстермінация. Тота найбільша компромітация европейскых вартости фурт жде на переробліня, чого результатом было бы ефективне остережыня для будучности. Експозицию заперат част Артиста як свідок драмы.

Анджей Жыґадло

Анджей Жыґадло (1988 р.) то абсольвент Малярства і Консервациі та Одновліня Мистецтва Академіі Красного Мистецтва в Кракові. Занимат ся малярством, рисунком, ґрафіком і фотоґрафійом. В його заінтересуванях є тіж документация і консервация памяток, істория мистецтва, іконоґрафія забытків полудньово-східньой Польщы.

Малярска творчіст Анджея Жыґадла вказувана была м.ін. в краківскій ґалериі Art Agenda Nova, Нацийональных Музеях в Кракові і в Ґданьску, Новогутскым Центрі Культуры ци ґалериі авкцийного дому DESA Unicum в Варшаві. А. Жыґадло был двократным стипендистом Міністра Культуры і Нацийональной Спадковины. Постійні спілпрацує з Руском Бурсом. Намалювал образ «Деревце», котрый был головным мотивом лемківского плякату, упамятняючого 70. річницю Акциі «Вісла». Єст автором ілюстраций до двох части книжочок для діти з сериі «Баі Русинів і інчых народів». Активні діє для розвитку Діґітального Архіву Руской Бурсы, котрого сам є спілосновательом (архів возник в 2017 р. в наслідстві переданя выняткового депозиту Стоваришыню Руска Бурса, чого сам Жыґадло был інспіратором).

Обшырна бесіда з артистом є до почытаня на нашым портали: по лемківскы або по польскы.

Фот. Анджей Жыґадло