Жупан Худік нагородив Штефана Штеця

Пряшівскый самосправный край (ПСК) нагородив вызначны особности і колектівы реґіону. Передаваня Нагород Пряшівского самосправного краю і Нагород председы Пряшівского самосправного краю проходило в четверь 23-го новембра 2017-го року в рамках святочного ґалапроґраму в Театрі Йонаша Заборьского в Пряшові. Інформовав о тім словацькый денник Korzár. Міджі оціненыма є і Штефан Штець – русиньскый фолклоріста.

Нагороды ПСК

Тот рік Нагороды ПСК здобыли трьоми лавреаты. Найвысше крайске оцініня было уділено бывшому директорови Справованя і утримованя драг ПСК Владимірови Козакови, in memoriam, за ціложывотне діло. Далшым лавреатом стала ся Фолклорна ґрупа Раславічан, котра нагороду здобыла за вынятковы успіхы в конкурзі Zem spieva, довгорічну і успішну популарізацію фолклору і утримованя традіцій Вышнього Шаріша. Нагороду ПСК перевзяв собі і Михал Замковскый, римокатолицькый місіонарь.

Нагороды председы ПСК 

І тот рік передали ся і Нагороды председы ПСК. Дослугуючій жупан Петер Худік вырішыв оцінити тот рік Іґора Дротаря за веце як 40-річну успішну карьєру і успіхы досягнены в моторістічнім шпорті і за популарізацію шпорту і пропаґацію реґіону. Другым тогорічным лавреатом стала ся історічка Нора Баратова, котра нагороду здобыла за ціложвытовне діло в области історії, педаґоґікы і културы.

За вынятковы успіхы в конкурзі Zem spieva і за утримованя і пошырьованя традічной русиньской културы собі нагороду од Петра Худіка перевзяв і фолклоріста Штефан Штець.

Штець є соловым співаком русиньскых, но і шарішскых ці земпліньскых народных співанок. Окрім того робить в русиньскій редакції Народностно-етнічного высыланя Радіа Патрія в Кошыцях, котра належыть під верейноправный Розглас і телевізію Словеньска. В державній телевізії модерує і маґазин о жывоті в словацькых реґіонах під назвов Ahoj Slovensko.

Нагороджены Русины в попередніх роках

Нагороды Пряшівского самосправного краю і председы Пряшівского самосправного краю ся уділюють од року 2004. За тот час было уж оціненых і дакілько Русинів. Русиньскыма лавреатами были Його блаженость Николай, православный архієпіскоп, співачкы Марія Мачошкова, Анна Сервіцька і Моніка Кандчарова, малярі Юрій Кресила і Андрій Смолак, а так само і доктор ортопед Ян Кльоць.

Жрідло фотоґрафії: Аґентура SITA.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА