Жнива, ціпы, молочыня, повересло, кычкы – тото вшытко в середу в Ґладышові

В найблизшу середу, 14. серпня/авґуста, Лемківска Едукацийна Загорода в Ґладышові рыхтує про вшыткых заінтересуваных змогу познати процес давного жнивуваня – подію під назвом Жнива на Лемковині.

В рамках паругодинной подіі будут проведены варштаты, котры од практичной стороны дадут змогу навчыти ся ріжных ґаздівскых робіт, котры давно тому являли ся обовязковыма в період жнив.

Практика на першым місци

Єдным з основных ціли самого проєкту, але і загальні діяльности ґладышівской загороды є вказувати на ріжного рода роботы, процесы, техніку од практичной стороны. «Предовшыткым робиме варштаты, жебы молоды люде штоси запамятали, але найвеце залежыт нам на тым, жебы молоды люде тото виділи нажыво, бо товды відомо, же ся дуже скорше запамятує», бесідує Ваньо Дзюбина, основатель Лемківской Едукацийной Загороды.

В рамках варштатів каждый буде міг схоснувати ціпы, зробити наконец зерно, а в меджечасі навчыти ся клепати косу, ци посмотріти, як ся єй давно тому рыхтувало до жнив. «Окрем практичной страны, повіме кус о традициі, яка колиси бывала. Кєд іде о жнива, то ся іх трактувало як барз важну подію. Бо як ся удали жнива, то был і хліб», продолжат В. Дзюбина.

Орґанізаторы мают в плянах урухомити такой першый раз од повійня стару машыну до молочыня, котром буде обертал кєрат. Трафила она до музейной загороды в Ґладышові з недалекого Смереківця.

Околожнивны роботы

Окрем робіт точно повязаных зо жнивами, як напр. кошыня зерна ци пак його молочыня, в рамках подіі буде нагода навчыти ся дальшых, околожнивых давных ґаздівскых прац. «При нагоді вкажеме, што ся зо соломы робит. Буде мож навчыти ся зробити власны повересла, або кычкы», кінчыт орґанізатор.

Маючы скошене зерно, участникы варштатів будут мочы отримати з него муку. Прото же одбуде ся презентация схоснуваня забыткового вітрового млина. Тот походит зо середньой Лемковины. В загороді найти мож і другій з 1938 рока, котрый трафил з околиц Липинок.

В рамках подіі, котра зачне ся о 14.00 год., участникы будут мочы частувати ся традицийныма лемківскыма стравами. Подія є реалізувана при спілпрацы з Ґміном Устя Рускє, котра фінаносово єй підпорила. Буде то уж друга подія при спілпрацы з місцевым ґмінным урядом. Не так давно завершыл ся проєкт Жытя на селі 100 років тому, в котрым брали участ ученикы парох шкіл з ґорлицкого повіту. В реченых варштатах участ взяло товды 414 учеників.