…Затримайте ся, може серед нас єст тот, котрого сте любили?… – „Реґістер Забытків” – середа, 20.00 год.

Такій напис найдеме на єдным з воєнных цмонтерів І Світовой Войны. Світ так хотіл, же немалий слід по ней лишыл на Лемковині. То великє чысло воєнных цмонтерів, якы найдеме порозсипуваны по вельох лемківскых селах і верхах Лемковины. В днешнім проґрамі в радийовий реґістер вписуєме воєнний цмонтір но. 4 в Грабі, якій уважаний є за єден з найбарже урокливых, ци навет найгарщых, або найліпшых проєктів Душана Юрковича. На першым місци мусиме єднак памятати, же єст то місце, якє свідчыт о людскых жертвах понесеных през діяня інчых люди.

Запрашам до выслуханя днешнього одтинка, а пониже презентуєме знимкы авторства Мирослава Быстрка зо стороны starecmentarze.pl (де найти можете вельо інчых прекрасных і цiкавых знимок). Горячо дякуєме за можливіст іх удоступліня.

„Реґістер Забытків” то познавчий проґрам, в якым зазнаємляме ся з Лемковином в скали мікро.
Премєра проґраму – середа 20.00 год., повторіня четвер 2.00 і 8.00 год., субота 13.30 год, за лемківскым часом.