Засідав Націоналный совіт Русинів. Списованя в Сербії буде в октобрі

Як інформовала аґентура Рутенпрес, 14-го марца 2022-го року в Руськім Керестурі одбыло ся 25-те засіданя Націоналного совіту Русинів – самосправного орґану Русинів у Сербії.

На засіданю обговорили ся оцінкы роботы і фінанцованя з попереднього року, але так само і планы, котры ся мають выповнити в тім році. Головно в рамках орґанізацій, котрых зряджовательом є совіт – Заводу про културу войводиньскых Русинів, Новинарьско-выдавательской інштітуції Руске слово і Русиньского народного театру Петро Ризнич Дядя, але і самого совіту.

По двох роках перервы, з причіны пандмії, совіт обговорив і календарь репрезентатівных подій Русинів, в рамках котрого мають ся з орґанізаторами сконзултовати точны терміны акцій. Бісідовало ся і о слідуючім Дні Русинів Сербії, котрый ся святкує в януарі.

Централны святкованя все проходять на іншім місці. Тот рік ся на святочній академії Русины зышли в Новім Саді, за інформаціями аґентуры Рутенптес ся в році 2023 буде святковати в Коцурі.

Рік 2022 буде важным нелем про русиньску, але про вшыткы народностны комуніты в Сербії. Белеград переніс списованя жытелів із 2021-го на 2022-ый рік. Люди ся будуть списовати в осени, од 1-го до 31-го октобра.

Од резултатів списованя, так як і в іншых країнах, будуть залежати далшы права, котры будуть годны Русины в Сербії мати в будучности. Русинів у Сербії зато чекать кампань перед списованьом. Великым неґатівом, котрый може овпливнити резултаты, є реалность, котров є велика міґрація до іншых держав за роботов. Міґрація дотулять ся, самособов, і Русинів.

Народностны меншыны тот рік мали голосовати і у меншыновых выборах до націоналных совітів, в котрых собі выберають своїх представителів до того самосправного орґану на далшу каденіцю. Выборы мали быти в новембрі.

За інформаціями, котры приніс Рутенпрес, выборы будуть переложены якбач на першу половину 2023-го року. Причінов є списованя жытелів, кедьже наперед, як інформовала аґентура, є потрібне мати з нього резултаты. А так само бы не было добре, жебы довєдна робила ся кампань ку списованю, і ку выборам.

Жрідло фотоґрафії: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА