Засіданя в Будапешті

В середу 14-го септембра 2016-го року одбуде ся в головнім місті Мадярьска в Будапешті подія під назвов Засіданя на честь академіка Антонія Годинкы. Лекції будуть проходити в будові Уряду омбудсмана од 11.00 год. до 15.00 год.

В рамках події одзвучать лекції од внука академіка Антонія Годинкы, ведучого травматолоґіщного одділіня Др. Ласла Годинкы, єпіскопа Ґрекокатолицькой мішковецькой єпархії Др. Атаназа Ороса, підкарпатьского языкознателя із Береґгазького мадярьского інштітуту Др. Іштвана Черничка, доц. історії Др. Йожефа Болтіка із Будапешта і Др. Михаіла Капраля, ведучуго Русиньского наукового інштітуту при Русиньскім націоналнім самосправованю.

Подія одбуде ся під патронатом представителькы Русинів в мадярьскім парламенті Віры Ґіріц і мадярьской омбудсманкы Ержейбет Салайне Шандор.

В тот день там буде одркыта і выставка покійного Атаназа Фединця, котру одкрыє ведучій Музейной експозіції при Русиньскім націоналнім самосправованю в Мадярьску Др. Золтан Кламар. Участным ся приговорить і державный секретарь з вопросів церьковных, народностных і цівілных звязків Мікловш Шолтес.

Антоній Годинка быв вызначный славіста, історік, академік Мадярьской академії наук, ректор Печской універзіты і честный председа Підкарпатьского общества наук. Народив ся 7-го фебруара 1864-го року в селі Ладомирів на Пряшівскій Руси, втогдышня Австро-Угорьска імперія. Умер 15-го юла 1946-го року в Будапешті.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА