Засіданя Світовой Рады Русинів/Руснаків/Лемків

В суботу, 20. вересня 2014 р. в Старых Янковцях (Хорвация), проходило засіданя Світовой Рады Русинів/Руснаків/Лемків.

Посеред актуальных проблемів, якыма занимала ся Рада, важном заявом было підтриманя рішыня культуральных і соспільных русиньскых орґанізаций з Підкарпатской Руси о ситуациі на Украіні – Світова Рада не інґерує во внутрішні проблемы той, ани інчой державы світа, але вымагат од украіньскых власти респектуваня записів Европейской Карты Реґіональных та Меншыновых Языків, котру Украіна ратифікувала в маю 2003 рока.

При нагоді стрічы, засідала тіж Комісия Інформациі і Выдавництв, котра представила стан проєкту выданя збіркы русиньскых коляд. Роботы над книжком такой ся уж скінчыли, а єй выданя заплянуване на конец 2014 рока – потвердил лідер проєкту, етноґраф і фольклориста Іван Чіжмар зо Свидника.

Світова Рада Русинів/Руснаків/Лемків то 10-особовий выконавчий орґан орґанізуваного раз на два рокы Світового Конґресу Русинів/Руснаків/Лемків, зложений з членів русиньскых орґанізаций з Сербіі, Украіны, Словациі, Мадяр, Польщы, Румуніі, Хорвациі, Чешской Республикы, ЗША і Канады, та представника Світового Форум Русиньской Молодежы.

Інформация за аґенцийом РутенпреС: vesti.ruthenpress.info.