Засідала редакчна колеґія журнала Отцюзнина

Як інформовав Юрій Шиповіч, голова Русиньского културолоґічного клубу і головный редактор културно-белетрістічного журнала Отцюзнина, 3-го януара 2024-го року в Центрі словацькой културы в Ужгороді одбыло ся засіданя редакчной колеґії журнала.

На засіданю брали участь і дописователі того періодікума Михаіл Зан – етнополітолоґ, доцент Катедры політолоґії і державного управліня Ужгородьской націоналной універзіты (УжНУ), Володимір Фенич – кандідат історічных наук, доцент Катедры модерной історії Україны і загранічных країн УжНУ, і кандідат історічных наук Др. Павел Леньо – доцент Катедры археолоґії, етнолоґії і културолоґії УжНУ.

Участны обговорили роботу на третім чіслі обновленого журнала і його обсяг. Як далше інформовав Шиповіч, Володимір Фенич запропоновав до журнала запровадити рубріку Вызнамні карпаторусины, і уж в споминанім третім выданю в рамках ньой має приготовити статю о Юлійови Гаджеґови, карпаторусиньскім історікови, новинарьови, реліґійнім і културнім діятельови, од котрого народжіня 16-го януара того року мине 145 років.

„Кедьже Отцюзнина є журналом, котрый выходить раз на квартал, член редакчной колеґії Михаіл Куцкір запропоновав на задню сторінку часопису давати одповідный порі року (коли выходить чісло) пейзаж авторства єдного з вызначных карпаторусиньскых малярів,“ інформовав дале Юрій Шиповіч.

Журнал Отцюзнина выходить як кварталник із тіражов 500 фалатків. Обновити выданя нашого єдиного журнала на Підкарпатю подарило ся в році 2023 завдякы помочі професора Павла Роберта Маґочія, котрый про Русинів, якы на Україні не мають жадной підпоры, позганяв фінанції.

Журнал выходив уж в минулости, од 2016-го до 2018-го року, но через складны условія, котры Русины на Підкарпатю мають, його робота была перервана. Електронічны верзії журнала можете чітати і на нашім порталі.