Запрошыня до Тжцянкы. Вечер в музею

Музей Наднотецкой Землі в Тжцянці та грекокатолицка парохія Воздвыжыня Креста Господнього в Валчу (погранича великопольского і західньопоморского воєвідств) просят 12. мая т.р. на тематичну стрічу пн. «Сон про втрачений дім, значыт о культурі Лемків». Головным єй пунктом буде одкрытя выставы присвяченой темі Лемків, іх істориі та культурі.

Подія зачне ся о 17.00 год. офіцийным одкрытьом выставы в тжцяницкым музею. Дальше пройде культурно-історичний проґрам. На початку прелекцию нт. істориі і культуры Лемків выголосит др Мирослав Пецух (Любускій Музей ім. Яна Декерта в Ґожові Великопольскым). Пак голос забере парох валчаньской грекокатолицкой церкви – о. Аркадий Трохановскій, якій свою доповід зосередит на віроісповіданю Лемків та сучасній іх ситуациі. Дальше зачне ся концерт лемківского ансамблю «Барвінок» зо Свідвіна, а по ним будут спомины выгнаных Лемків, котры по 1947 році змушены были оселити ся в околицях Тжцянкы.

Окрем доповіди, концерту і споминів орґанізаторы стрічы заміряли проєкцию фільмів про сучасну Лемковину. Присутны будут мати змогу пізрити на днешні одвидины, ачий повороты лемківской молодежы на рідну землю. Дальше, аж до 21.30 год. тырвати будут варшаты для лемківскых діти, в рамках котрых пройде чытаня байок в лемківскым языку.

Вчас выставы «Сон про втрачений дім, значыт о культурі Лемків» запрезентуваны будут музейны експонаты представляючы колишнє жытя Лемків. Выставлене ґратя походит з Музею Наднотецкой Землі в Тжцянці, з Етноґрафічного Музею в Лодзі та Округового Музею в Ґожові Великопольскым. На выставі свoю приватну колекцию вкаже тіж Кжыштоф Быбель з Маломіц коло Шпротавы (любускє воєвідство). Конечно на выставі буде мож попозерати на богослужебны предметы з грекокатолицкой парохіі з Валча.