Запиште ся в єдину Руску Бурсу на Лемковині, кличут з давен-давна

Аґітация, коли іде в парі з міркуваньом, николи не є зла. То подібні як з пропаґандом, котрой часом нам бракує. Традициі в тым наміріню маме шыковны. Лем часом си на них забываме.

Выділ Руской Бурсы в Ґорлицях знал, як робити пропаґанду. Тот днешній ся вывчыл од того старшого, зато наша аґітация міцна і шырока. Неєдному она може і вадит, але другым она ся любит, як то быват зо вшыткым. Тым, што возлюбили Руску Бурсу, рекомендуєме: заплатити членьску складку, приходити на засіданя, і приводити гын своі діти. Рекомендує ся і дальше, жебы вшыткы сознательны, грамотны Лемкы чым скоре записали до ґорлицкой Бурсы.

От выділа Руской Бурсы в Горлицах¹.

І.

По случаю наближаючого ся Общого Собраня членов Общества, выділ подає до відомости слідуюче:

1) вшиткы члены повинни взяти участь в рочном собраню Общества и разом рішати о Єго ділах, плянах и т. д.,

2) вшиткы члены повинни тепер, або на Собраню заплатити членску вкладку за тот рок,

3) родичи находячих ся в бурсі ученников сут тым самым членами бурсы и повинни взяти участь в Собраню,

4) вшиткы сознательны Лемкы повинни вписати ся в члены одынокой руской бурсы на Лемковщині. Членска вкладка виносит 8 зл. рочно (для интелигенции 6 зл.), а вписове 0,50 зл. Записати ся можна на Общом Собраню.

5) особных повідомлень, ци запрошень на Собранє, котре отбуде ся 27. т. м. (неділя) не розсылат ся.

ІІ.

Выділ О-ва „Руска Бурса в Горлицах” с душевном радостьом и глубоком благодарностьом витат инициятыву дакотрых наших людей в ділі организации збора пожертвовань продуктами на ціли бурсы.

От себе выділ просит горячо вшиткых рускых людей в міру сил и можностей переводити у себе такы зборы продуктов и доставляти до Горлиц.

Заряд бурсы прийме с сердечном благодарностьом всякы продукты, як горох, фасолю, цыбулю, морков и т. д., а передовсем бандуры и опалове дерево, о котры зрештом на селі найлегче.

Просиме солтысов, або передовых рускых людей сорганизовати комитеты с 2 – 3 особ, котры бы заняли ся збором и доставом до Горлиц.

Выділ бурсы просит выяснити людям, што зберат ся не для того Штефана, ци Фецка, котрый єст в бурсі с вашого села, лем зберат ся для бурсы, яко осередка, где наша лемковска молодеж одержує належите выхованє, приготовленє до будучой народной роботы и можность наукы.

Брак нашой, народу отданой, интелигенции отчуваме на каждом кроці, а головно тепер в так тяжкых часах для нас вшиткых, – тож дбайме о тото, штобы мы дождали ся єй як найбольше и як найскорше, а тогда и прудше с нами каждый буде ся числити, а не оминати нас и не даме ся быле – кому баламутити!

Вшиткы пожертвованя будут оголошены в газетах.

                                                                                       Выділ

                                                                                        О-ва „Руска Бурса”

                                                                                          Горлицах.

¹[в]: Лемко, орґан Лемківского Союза ч. 40. (75.), 24. жолтня (11.) 1935 р.