Заперта дорога Дукля-Ґорлиці в Перегримці. Обовязує обізд

Од вчера, то є од 19. мая тр., заперта єст важна під взяглядом комунікацийным дорога Дукля-Ґорлиці за Новым Змигородом. Єст она комплексово модернізувана і роботы вымагают цілковитого вылучыня з руху.

Ремонтуваный є одтинок од крижівкы при Народным Домi в Перегримці до мосту на потоку Клопітниця. Його долгіст то кус веце як єден кілометер. Обізд вызначыли через Ясло.

Тота сама траса была заперта од половины квітня/апріля тр. Роботы мали товды тырвати два тыжні. Выдолжыли ся з огляду на погоду, котра унеможливляла вести роботы.

Тепер дорога має быти заперта до 2. червця/юнія, але выконавця робіт застерігат, што термін може быти пересуненый.