Замалювана таблиця в Ріпках – вычыщена

Як поінформувала редакцию єдна зо спілпрацівничок нашого радия, будуча тіж активістком Стоваришыня Лемківской Молодежы ЧУГА в Польщы, знищена польско-лемківска таблиця в селі Ріпкы на Лемковині остала вычыщена. В тій справі інтервенювала в уряді ґміны Устя Ґорлицє (д. Рускє). Секретар ґміны – Марек Олесь обіцял заняти ся справом, а в пізнійшій відомости заявил, же таблицю повело ся вычыстити так, же днес мож прочытати лемківску назву місцевости. На жаль, незнаний справця таблицю замалювал олійном фарбом, прото єй выгляд є далекій од того сперед інциденту. Дальше дознали сме ся, же в найблизшых днях таблиця буде знята, жебы спрібувати єй реконструувати, або – кєд буде то неможливе – привернути правильний выгляд, заміняючы на нову.

О знищыню таблиці інформували сме на нашым портали пару днів тому.

фот. горі: Олена Дуць-Файфер з єдном з таблиц села Ріпкы перед першым монтажом; архів ОДФ.