Закінчыня шкільного рока 2014 для діти і молодежы, якы вчат ся лемківского языка

Ден по офіцийным закінчыню шкільного рока в школах, тє. 28.06.2014 рока, Стоваришыня Руска Бурса в Ґорлицях орґанізувало циклічну уж імпрезу під наголовком «Закінчыня шкільного рока для діти і молодежы, якы вчат ся лемківского языка». Сама ідея того рода подіі є дост проста. Руска Бурса, як місце де колиси мешкали, вчыли ся Лемкы, все пропаґувала освіту, а в такій спосіб хоче молодым Лемчатам вынагородити труд вложений во вчыня лемківского языка. Знаме добрі, же лемківскій є додатковым предметом, прото тіж хвалит ся поставу родичів, якы ставляют вымаганя перед своіма дітми, а діти зато, же ю піднимают. Остатніма місяцями вельо бесідувало ся о тым, што є сутю лемківскости, бо, як ся вказувало, не для вшыткых то тото само? Для мене і бурсаків на певно язык в полным того слова значыню, так бесідуваний як і писаний.

Тішыт, же молодых Лемчат якы хотят ся свого вчыти є так вельо, бо в тым році дорахували сме ся 74 діти, а то лем част зо вшыткых, якы фактычні на тоты занятя ходят. Ціла подія мала місце в Мазярскій Загороді в Лоси. А на стрічу своіх выхованків привезли до нас 3 учытелькы лемківского языка:
– Пані Варвара Дуць – діти і молодіж зо шкіл в Ґладышові, Устю Рускым і Ґорлиц,
– Пані Анна Рыдзанич – діти зо шкіл в Ганчові, Брунарах, Баници і Высові,
– Пані Анна Дубец-Дыльонґ – діти з Ганчовы.

Кєрівничка загороды, пані Клявдия Збєґєнь, разом зо своіма спілпрацівниками зрыхтувала вельо атракций. Ціла імпреза была утримана в стилю стародавных спортовых забав. Певно стародавных буде гев нерівнозначным понятьом зато, же были то в великій мірі забавы іщы з часів мойого дітиньства, для днешньой молодежы уж чысто забыти і незнаны, зато так атракцийны. Были то напримір: стріляня з прашкы до ціли, цимберґай, стріляня до піраміды з пушок, літаня в мішках, перетіганя мотуза, сельскы щуґлі, метаня підковом, ловліня рыбок в балиі, глухій телефон, клясы, гра в скаканя в ґуму, як тіж пластычны занятя – малюваня сельской загороды з тектуры і інчы. Были тіж варштаты робліня старых забавок – йойо і лекция каліґрафіі правдивым пером і тинтом. Хоц для учеників был то перший ден вакаций, старшы охочо брали участ в конкурсі знань з лемківского языка. Вшыткых получыл тіж конкурс «Яка то мелодия», де окрем згадуваня співанок, вшыткы разом співали іх фраґменты. На нас, як на дорослых, барз великє вражыня зробила інвенция Пані ведучой загороду. Вшытко выглядало прекрасні і аж ся просило, жебы ся ним побавити. Щестьом, не лем нам ся подабало, бо і діти літали захоплены од єдного місця в другє, хотячы вшыткого спрібувати. По мучачых спортовых вызванях, на діти ждала гостина. На свіжым повітри, при крас хвили, вшытко барз смакувало. Наконец, каждий з участників достал невельку символічну нагороду.

Не легко заполнити час штораз барже вымагаючій молодежы і дітям. Маме надію, же і тым разом нам ся повело. Такы стрічы сут не лем важны зо взгляду на подяку і заохочыня до дальшого здобываня знань з лемківского простору, але тіж зо взгляду на інтеґрацию молодого поколіня. Часто діти не знают ся медже собом, а важне є жебы мали почутя і свідоміст, же іх вельо, а в купі сила. Можут побесідувати по свому, порівнати тіж своє знаня з інчыма школярями, што додатково мобілізує до вчыня і бесідуваня в своім рідным языку. Такы подіі вымагают пред нима бесідувати лем в лемківскым языку, на сто смотріли учытелькы і – хоц то уж вакациі – фурт пильнували языковой дбалости.

А як выглядала ціла імпреза? Зазрийте до нашой ґалериі.

ЗАКІНЧЫНЯ РОКУ 2013/2014 НА ЗНИМКАХ (фот. Марися Дубец, Варвара Дуць)