Закінчыл ся XXXIV Медженародовий Фестіваль Церковной Музыкы „Гайнівка 2015”

Вчера, 24. мая 2015 р., закінчыл ся XXXIV Медженародовий Фестіваль Церковной Музыкы “Гайнівка 2015″.

Жырі, котрого ведучым є проф. Ромуальд Твардовскій, рішыло тіж про нагороды і выріжніня для участників.  Перше місце серед парафіяльных хорів признано для Мужского Митрополитального Хору “Символ Віры” з Воронежа в Росиі. Хор запрезентувал барз высокій музычний рівен і сміло міг бы конкурувати в катеґориі професийональных хорів. А для тых признано аж два першы місця: для Камерального Хору Державной Фільгармоніі в Челябіньску (полудньовий Ураль) і для Хору Державного Радия Украіны ім. П. Майбороды з Кыйова. Перший з них, хоц в назві камеральний, то по правді єден з чысленнійшых хорів фестівалю і рахувал більше як 50 професийональных співаків. Другій фіналіста той катеґориі, обік “клясыкы” церковной музыкы в творах Березовского і Веделя, вказал сучасны композициі духовной музыкы. Мож было почути твір Р. Твардовского (ведучого жырі) і Лесі Дичко – члена жырі, яка за своі композициі зберат найвысшы в світі нагороды і выріжніня.

В катеґориі хорів музычных університетів перше місце признано Камеральному Хорови Музычной Академіі в Катовицях в Польщы. Під музычным взглядом, хор вказал барз высокоякістний рівен і на увагу заслугує факт, же то хор оснований людми, для котрых “східній” дух і естетыка сут чужы. Дрібны поправкы в співаных текстах дозволили бы, в оціні автора допису, на окрисліня выступу того хору як найліпший на фестівали.

Тогорічний фестіваль был богатий в додатковы концерты і ювілеі, котры придаючы іщы більше атракций, збогатили і так шырокій проґрам.

Днес вечером (понедільок, 25. мая) о 20.00 год. просиме на повторіня бесіды з директором фестівалю п. Миколайом Бушко, якій был ініциятором і головным орґанізатором фестівалю церковной музыкы в Гайнівці. Духовна музыка звучыт в радию лем.фм в кажду неділю, коли то почути мож і награня з реченого фестівалю.