Загыбаючы языкы. Комплексовы моделі дошліджынь і ревіталізациі

Стоваришыня Вілямівяне і Выділ Артес Ліберталес Варшавского Університету запрашают на медженародову конференцию Загыбаючы языкы. Комплексовы моделі дошліджынь і ревіталізациі, яка проходила буде од 11 до 13 червця того рока в Вілямовицях. Конференция орґанізувана є в рамках проєкту під тым самым наголовком. Предметом досліджынь сут три загорожены языкы в двох державах: науатль в Мексику, лемківскій і вілямівскій в Польщи. Головном цілю проєкту єст выпрацуваня інтердисциплінарного і комплексового моделю дошліджынь над загороженыма языками, стисло повязаного з  теоретычныма стратеґіями, а тіж практычныма способами іх ревіталізациі. Більше до почытаня о проєкті під ТЫМ мотузком.

В тракті тридньовой конференциі буде бесіда м.ін. про тото, чом вартат ревіталізувати загорожены языкы, про писменничу культуру і літературу в языковій ревіталізациі, про стратеґіі языковой одновы, ци про документацию і технолоґію в языковій ревіталізациі.
Лемківску тему запрезентує др габ. Олена Дуць-Файфер з прелекцийом Література а процес розвитку і ревіталізациі языковой достоменности на примірі лемківской літературы.
Цілий проґрам конференциі до стягніня за ТЫМ мотузком.

Окрем науковых сесий заплянувано тіж отворіня выставы Вілямівскій Язык колиси і днес і спектаклі в вілямівскым языку: Малий Прінц і Спомины Юзефа Ґары.