Зачінають выставкы із великодньов тематіков

Кідьже векшына Русинів на Словакії єднако як і векшына Словакії ідуть за новым календарьом, в тых днях зачінають в дакотрых селах і містах выставкы, котры суть присвячены як раз Великодню – святу, котре за новым штылом буде того року 27-го марца.

Першов выставков, на котру звертаме увагу, є „Карпатьска писанка“ в Гуменнім. Вернісаж выставкы одбуде ся 10-го марца 2016-го року о 15.00 год. в просторах Вигорлатьского музею. Выставка буде до 8-го апріля і орґанізатором є спомянутый Вигорлатьскый музей в Гуменнім вєдно із Окреснов орґанізаційов Унії жен Словакії.

В неділю 13-го марца можете іти до Міджілаборець. Там буде в Домі културы о 14.00 год. вернісаж выставкы під назвов „Чарівны шкарупкы“. Орґанізатором выставкы великодніх декорацій є місто Міджілабірці, і выставку буде мож видіти до 23-го марца.

В тот самый день можете о 15.00 год. в Домі културы в Меджілабірцях іти на концерт під назвов Пукета тонів. Народна музика Шарішанці буде в Міджілабірцях грати концерт присвяченый Міджінародному дню жен.

Вже третій річник выставкы під назвов „Хмелівска писанка“, на котрій буде мож видіти і то, як ся окрашають писанкы, буде проходити дня 19-го марца 2016-го року в Културнім домі в Хмельовій. Выставка зачінать о 15.00 год. і орґанізатором є Обчаньске здружіня Русин Хмельова. Выставку підпорило і село Хмельова.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА