За послідніх 24 годин на Підкарпатя із заграніча вернуло ся 945 краянів, станом на 27-го марца

О кількости Підкарпатців, котры вернули ся із заграніча за послідній тыждень на бріфінґу інформовав першый заступник головы Закарпатьской Областной державной адміністрації (ОДА) Олексій Гетманенко, пише Mukachevo.net.

Подля Гетманенка од 18-го до 26-го марца 2020-го року марца із заграніча вернуло ся 7 674 містных жытелів, з котрых 41 людей путовало з Італії.

На Україні, станом на рано 28-го марца, зареґістровали 311 припадів коронавірусовой хвороты. Вакціна проти Covid-19 не екзістує. На даный час найвеце ефектівныма способами охраны од вірусу є обмеджіня рушаня (у рамках міста, области, реґіону, державы і меджінародного) і запроваджіня карентены.

Припоминаме, же через енормне пошырьованя коронавірусу на Україні запровадили режім надзвычайной сітуації. Володимір Зеленьскый оголосив обмеджіня пасажірьского руху через граніці в обидва бокы од кінця дня 27-го марца.

В предвечур, як заперали ся граніці, на закарпатьскых гранічных переходах вытворили ся довгы колоны.

На Підкарпатю закрыли часть перевалів, котры ведуть до области. На чотирьох перевалах при вязді до Закарпатьской области, конкретно Ужоцькый, Торуньскый,  Яблунецькый і Абраньскый, были даны барьєры. На двох послідніх перевалах будуть контрольно-переходны пункты, де  буде ся робити контроля обчанів, котры входять до области. Єднов із процедур буде контроля теплоты, підкреслив Гетманенко.

Коронавірус на Підкарпатю

У лабораторії Мінітерства охороны здоровля в Києві подтвердили Covid-19 у жены з Мукачова, котрій діаґностіковали коронавірус 24-го марца, інформує Закарпатьска ОДА. За даныма, їй муж вернув ся з Італії 6-го марца.

В сучасности їй стан стабілный, лічіть ся у Закарпатьскім областнім інфекційнім шпыталю. Мукачівска містька рада інфомровала, же ідетіфіковала вшыткы особы, котры могли контактовати ся з інфікованов женов.

Мукачівці не доторимують карантенный режім

Мукачово вже майже два тыждні жыє у режімі карантены. Пусты уліці і заперты обходы: ці змінило ся місто, і ці вшыткы дотримують самоізолацію перевірила корешпондентка порталу lem.fm.

Перепозераючі фоткы на соціалных сітях як вызерають підкарпатьскы міста в періоді карантены, мож зробити резултат, же жывот в містах має „павзу“. Но кедь ся перейдете уліцями Мукачова, надіяти ся на поліпшіня епідеміолоґічной сітуації не мож. Люди продовжують ціркуловати як у обычаный день. Дотримованя карантенных правил у Мукачаві очекує веце. В тот час, коли векшына україньскых міст демонштрує уліці без людей, Мукачівці особливо рітм жывота не мінили.

Наперек інфомрованю і аґітації дома зіставають далеко не вшыткы. У не великім Мукачові (86 339 жытелів станом на 2016-ый рік, позн. ред.) творять ся шоры за потравинами, і то 20 аж 30 людей котры не дотримують діштанцію.  Можеме там і днесь стрітити людей без средств охраны. А суть то люди середньой і старшой віковой катеґорій, часто якраз они і роблять в контакті з людми.

Торг на свіжім воздусі 

Єден з найбівшых торгів Закарпаття „ГІД“ не заперають на карантену. Інформовало здобыло Mukachevo.net у адміністрації компанії.

Торг „ГІД“ фунґує не позераючі ся на опатріня, котры были акцептованы по цілій Україні.

Подля представителів компанії ТОВ тот торг є на свіжім воздусі, і то кардінално одрізнять ся од запертого простору в остатніх обходах.

Одповіді людей на коментарь з боку корешпондента о небезпечности коронавірусу

Шофер таксі, 47 р.: „Я не вірю, же даякый коронавірус екзістує, то придумали таку шоу богаты, абы ся над нами простыма людми посміховати.“

Сторожця обходу, 52 р.: „А нашто мені маска? Я не кусаю! Рукы мыю, рот полокам.“

Продавачка на торзі „ГІД“, 45 р.: „А што вы ся мене просите такы глупы вопросы? Вы думаєте у мене є час думати над такыма дурніцями. Я ся в ночі помолила, а там як Бог дасть.“

Шофер містького транспорту, 60 р. : „Чоловіку днесь ани копійку не дають заробити! І што мі теперь робити без роботы? Понапридумують там вшелиякого, а нам людям што пак робити?“

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА