За чым сме ся зышли?

Як сме уж інформували, в суботу – 5. марця 2022 р., одбыло ся загальне засіданя Стоваришыня «Руска Бурса» в Ґорлицях. Но, в тот сам ден в бурсяных просторах одбыла ся тіж стріча редакторів і спілпрацівників першого лемківского радия ЛЕМ.фм, якє самособом діє при обществі.

Певно уж част з вас знає, за чым то сме ся зышли (інформували сме о тым факті через пару слідуючых дни в нашых радийовых авдициях), але не пошкодит написати і пару слів про тото.

Стріча зачала по засіданю, прото што част з редакторів то тіж члены стоваришыня. Головном цілю стрічы редакторів было познати функцийональніст нового емісийного систему, якій дає ліпшы можливости не лем для редакторів (реализаторів) авдиций нажыво, але так само для вас – слухачів.

Отже, систем дає тото, чого не видно, значыт редакторска робота «од кухні» ся поправила. Але добром справом є певністю тото, о што уж нераз сте нас звідували. Наш плеєр, якій можете залучыти на сайті lem.fm, позвалят вказувати наголовок співанкы вєдно з окладинком платні, на котрій ся она находит. В тот спосіб іщы ліпше познаєте выконавців і творців, якых представляме в першым лемківскым радию.

Окремом справом є тото, што час-до-часу являли ся технічны проблемы з высыланьом в традицийным ефірі. Не раз, не два писали сте до нас о тым, што ци то в Ґорлицях, ци в Польковицях радийо хвильово перестало грати, трафила ся дака перерва, або тріскы. Того уж тепер має не быти. В тым місци за вшыткы Вашы дотеперішні анонсы дякуєме. Легше єст нам робити порядне радийо, коли даєте знати, што мож поправити.

Вчас радийовой стрічы вшыткы думками лучыли сме ся з нашыма редакторами і спілпрацівниками з Украіны, якы пережывают в тых часах тяжкы хвилі в звязку з войном зачатом Росийом.