З Пряшова до Санча – різба Яна Кырлічкы

Од днес, 16. лютого/фебруара 2018 р., в ратушовій ґалериі Ґалицийского Місточка в Новым Санчы мож обзерати різбы авторства русиньского різбяра Яна Кырлічкы.

Tворчіст Яна Кырлічкы вказувана єст з нагоды выставы пн. Польско-словацка конфедерация різбярів: Мариян Пажуха і Ян Кырлічка, котру орґанізує Округовий Музей в Новым Санчы. Тема творів обох артистів обнимат подібний зміст, a спосіб артистичной выповіди різбярів може чудувати креативністю ци ориґінальністю, а заєдно простотом і легкістю вказаня выбраной істориі. Оба часто своі рельєфы вкрывают поліхромійом, што ближыт артистів під формальным оглядом. Каждого єднак характеризує інча вражливіст, што перекладат ся на індивідуaльний характер робіт.

Ян Кырлічка вродил ся в 1954 р. в Чехах, де были переселены з політичных причын його родиче. Отец был грекокатолицкым священником. До Пряшова вернули по парунадцетьох роках. Кырлічка уж од наймолодшых років різбил і малювал. Інтенсивні занимал ся мистецтвом до 15. рока жытя, в чым міцно підперали го родиче. Коли пришол конец 60. років, зас з політичных оглядів, вказало ся, же студиювати не може, тым більше на артистичным напрямі. Малярстві і різбі зачал ся посвячати наново в 90. роках. Перший раз його роботы вказано на выставі в Пряшові в 2003 році разом зо знимками його брата фотоґрафа.

Найбільшом інспірацийом в творчости Яна Кырлічкы єст віра. Біблийны мотивы переплітают ся з сучасным жытьом, видно в них і елементы традициі народной різбы. Музыка, котрой Кырлічка єст великым любительом, тіж є видна в його творах. Різбит, малює музыків в іхнім середовиску полным танця і радости, аж і клявнів ци блазнів – захоплют го свобідно ведучы ся люде. Творчіст Яна Кырлічкы мож было видіти уж м.ін. в Пряшові, Гуменным, Бардийові, Катовицях, Яслі ци Ґорлицях. В Новым Санчы буде мож ю видіти до 8. квітня/апріля 2018 р.

Фот. за: фб Яна Кырлічкы, сайт Польско-Словацкого Дому в Ґорлицях