Фридерик Шопен, «З повагом», просит Павел Малецкій – неділя, 20.00 год.

В проґрамі презентувана буде головні музика Фридерика Шопена, композитора, котрый был вынятково суровым судьом свойой творчости. Як послідню волю казал шмарити в оген вшыткы недокінчены, неготовы до друку творы.

Шопен был ґеніяльным композитором, так само як феноменальным піаністом. Был ним з вроджыня, «з натуры». Гры на тым інструменті вчыл го гушляр. Окрем того мал Шопен літературный талант. Дакус і рисувал, головно карикатуры. Всядиль, де бывал, ходил до оперы і до музеів. Мал акторскій талант, пародиюваньом розбавлял товариство. Найчастійше наслідувал інчых піаністів.

Шопен был чловеком о великым темпераменті, вражливым на жіночу чарівніст. Был глубоко віруючым. Тішыл ся опінійом найбарже вышуканого князя, аристократы. Был душом товариства. Жебы інчы могли танцувати – грал репертуар до гуляня. Іздил на сомарі, грал в білярд.

Творчый процес Шопена ділил ся на два етапы. Першый был спонтанный: творил при піаніні і записувал тото, што зродило ся з імпровізациі. Вшытко в стані творчого унесіня. Другій міг тырвати тыжні, місяці – был гляданьом і надаваньом творови послідньой формы, рыхтуваньом до друку. Часом істинно была то мука.

Был вынятково суровым судьом свойой творчости. Як послідню волю казал шмарити в оген вшыткы недокінчены, неготовы до друку творы. Кєд фактичні была бы сполнена, незнаных бы было коло 60 творів композитора. Творчіст Шопена ділит ся зато на дві сериі – гідны публикациі і тоты, котры сут гейбы ескізом, скомпонуваны, але не зрыхтуваны до пущыня в світ.

Слухайте творчости Шопена днес од 20.00 год.