З остатньой хвилі: Всезакарпатскій Зъізд Русинів в Мукачеві – одкликаний!

Як дознали сме ся од нашых кореспондентів з Підкарпатской Руси, плянуваний на днес на 10.00 год. (за державным кыівскым часом) Всезакарпатскій Зъізд Русинів в Мукачеві, орґанізуваний Народном Радом Русинів Закарпатя, остал одкликаний. На ляконічным комунікаті, котрий завішений єст на дверях будинку, де мал проходити зъізд, чытаме, же то з причыны уникніня провокаций. На теперішній момент не знаме, што бы мал точно значыти тот комунікат, але будеме інформувати о дальшых подіях в тій темі, кєд лем дознаме ся дакус більше.

Нашы кореспонденты вяжут одкликаня зъізду з неспокійном ситуацийом в Мукачеві, котрой причыном єст вбивство 18-літнього мужчыны ромского походжыня в ночы 8./9. жолтня (октобра). Тота траґедия, як пишут локальны медиі, може выкликати протесты і выступліня локальной ромской соспільности.

Днес, окрем Всезакарпатского Зъізду Русинів, Народна Рада Русинів Закарпатя заплянувала Фестіваль Русиньской Культуры «Червена Ружа», о котрым заявляли сме вчера. Початок фестівалю орґанізаторы вызначыли на 12.30 год. (за кыівскым часом).