З дотацій ПСК ішло 1,7 міліона до обновы народных културных памяток

Грошы з дотацій Пряшівского самосправного краю (ПСК) помогли за три рокы сохранити 120 народных културных памяток в реґіоні – каштелів, замків і храмів, як і обновити інфраштруктуру в їх околіці. Край на обнову, респектівно реконштрукцію дав понад 1,7 міліона евр.

Як інформовала Даша Єленьова, говоркыня ПСК, в періоді років 2021 аж 2023 край підпорив реалізацію тісячів проєктів в різных областях, і аж 122 проєктів в рамках обновы културных памяток UNESCO і народных културных памяток. Цілкова сума підпоры їх реконштрукції є 1,72 міліона евр.

„Наш ґрантовый проґрам служыть якраз на то, жебы сьме адресно помогли там, де поміч треба і дословно є жадана,“ повів Мілан Маєрьскый, председа ПСК з тым, же добры проєкты за його словами, котры служать вшыткым і помагають всокотити културне і історічне богатство, оплатить ся підпорити.

„Наш крає має в тім напрямі реално величезный потенціал, о чім свідчіть і факт, же ту маєме приблизно штиритісяч памяток і штири локаліты UNESCO,“ доповнив пряшівскый жупан.

В актуалнім році здобыло підпору краю натеперь 29 проєктів з културно-історічным акцентом, меджі котры розділило ся 130 тісяч евр. Влони ся підпорило 48 проєктів в сумі 1,04 міліона евр. У 2021-ім році то было 45 проєктів заміряных на реконштрукцію народных културных памяток, на што ПСК розділив 623 тісяч евр.

Ґрантову схему ПСК представлює Вызва председы, Вызва посланців, Вызва про реґіон, котра в тім році не была выголошена, а новотов од 2022-го року є Вызва Партіціпатівный розрахунок. Алокацію грошей на проґрам дотацій в слідуючім році будуть посланці Заступительства Пряшівского самосправного краю схвальовати на своїм децембровім засіданю.