З Балутянкы до Гутиска (3 част) – 70 процент – субота, 20.00 год.

На фото ― нашы гості. Од лівой стороны ― Данило Долиньскій зо своім орлом, посередині Михал Завійскій ― тіж зо свойом різбом. І Долиньскый, і Завійскый вродили ся в Балутянці. Коло лемківскых різбярів ― Надія Троян. Она выросла медже Лемками, полюбила іх язык, культуру, особливо різбу і спів, а днеска робит вшытко, жебы лемківска культура в Гутиску не заникла. Але, на жаль, асиміляция змінила переселенців з Балутянкы і Вількы, покус стерла барвы лемківского языка. В бесіді моіх респондентів лишыли ся хыбаль якысы рудименты, як лемківска вымова і інтонация.

Бесідуєме о выселіню зо села Балутянка, о селі Гутиско, де замешкали переселенці. Розуміє ся, гвариме о різбі. А тіж о срібным джерелі ― і о джерелах творчости; о тым, як Туркы захворіли на ґрипу ― а то было гірше, як ворожа куля; о тым, як Німці хотіли чыряти ся ― «Мерцедес» міняти на «Лемка», споминаме про медведя, якій любив цукєркы, о лемківскій ватрі в Гутиску і о тым, кілько за місяц різбяр мал зробити орлів, жебы выконати плян.