Юрій Штеньо здобыв Кріштальове крыло

В неділю 21-го януара 2018-го року проходило в Братіславі, в просторах Словацького народного театру, передаваня оцінінь Кріштальове крыло 2017 (Krištálové krídlo).

Як інформовала словацька державна пресова аґентура ТASR, в рамках ХХІ. річника того престіжного оціньованя было номінованых 29 особностей. Цілково здобыло оцініня 11 лавреатів, о котрых рішыли фаховы журі і Велика журі Кріштальового крыла. Меджі оціниныма є і Юрій Штеньо, котрый здобыв выняткове оцініня.

Юрій Штеньо

Професор Юрій Штеньо, родак із русиньского села Кленова, є вызначным фаховцьом в области неврохірурґії, декан Лікарьской факулты Універзіты Коменьского в Братіславі і донедавна довгорічный предноста Неврохірурґічной клінікы Лікарьской факулты Універзіты Коменьского. Выпрацовав методу мапованя нервовых драг електрічнов стімулаційов почас мікрохірурґічных операцій мозґу. Выпрацовав класіфікацію надорів (туморів) мозґу в области третьой мозґовой коморы, котра є цілосвітово принята.

Є автором веце як 400 фаховых публікацій і понад 600 лекцій по цілім світі. Быв оціненый Честным узнаньом Світовой федерації неврохірурґічных обществ за розвиток неврохірурґії на благо людства. В році 2015 быв записаный меджі 16 найвызначнішых неврохірурґів на світі. В році 2007 му презідент Словацькой републікы Іван Ґашпаровіч уділив державну нагороду Хрест князя Прибины 1-ой класы за розвиток неврохірурґії.

Кріштальове крыло

Кріштальове крыло є оцініня удільоване шторік од 1997-го року особностям на Словакії, котры досягли у своїй професії выняткову фаховость і успіх. Головнов думков Кріштальового крыла є обявльованя і пропаґація унікатных людей і їх професіоналных выконів, котры собі залужать честованя.

Оцініня ся передавають в катеґоріях філантропія, господарьство, архітектура, публіцістіка і література, театер і авдіовізуалне уменя, вытварне уменя, рок поп джез, музика, шпорт, медицина і наука. Уділюють ся і вынятковы ціны за ціложывотне діло, вынятковый успіх в загранічу ці іншу діялность.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА