Юбілейный річник літературного конкурзу

Од 6-го септембра до 28-го новембра 2018-го року є Сполком русиньскых писателів Словенська у співпраці із Академійов русиньской културы в Словацькій републіці і Інштітутом русиньского языка і културы Пряшівской універзіты в Пряшові выписаный вже 5-ый річник Літературного конкурзу Марії Мальцовской.

Літературный конкурз є шторік выписаный на найліпшы творы в области поезії, прозы, єсеїв і драмы в літературнім русиньскім языку.

До конкурзу авторы залучають ся анонімно. Оріґіналны творы в розсягу 10 аж 20 сторінок, котры не были перед тым ниґде публікованы, ся посылають в копертці, в котрій є вложена іщі єдна заліплена копертка із меном, призвіском, адресов і фотопортретом автора текстів. Як за Сполок пистелів інформовав Михал Павліч, коперткы з менами і призвісками будуть одкрыты председом тричленной пороты по оцініню конкурзу. Выголошіня резултатів конкурзу вже традічно одбуде ся в посліднім тыждню місяця децембер 2018-го року. Найліпшы творы будуть наслідно оцінены і опублікованы в часописі Русин, в літературнім додатку, котрый в тім журналі выходить і має го на старости як раз Павліч.

Покля маєте інтерес залучіти ся до Літературного конкурзу Марії Мальцовской, маєте непублікованы творы в споминанім розсягу, значіть такы, котры не были дотеперь выданы книжно, в пресі, не были поставлены на сцені театру, маєте мінімално 18 і жыєте в Словацькій републіці, потім можете свої тексты послати на ниже уведжену адресу:

ПгДр. Кветослава Копорова, ПгД., Інштітут русиньского языка і културы ПУ, уліця 17. новeмбра ч. 15, 080 01 Пряшів.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА