Йордан на Лемковині – посвячыня воды в Ліщынах (фот. Петро Басалыґа)

Ден 19. січня/януара т.р., як што рік в традициі східніх Церков, котры ідут за юлияньскым календарьом, є вынятково празднуваний, бо то свято Богоявліня – Крещыня Господа Ісуса Христа, ци за народным названьом – Йордан. В тот ден по Божескій Літургіі вірны вєдно зо священником ідут святити воду над поблизкы потокы, рікы, а кєд неє такой нагоды – святят воду в церквах. На Лемковині сеса традиция втримала ся по днешній ден. В селах, де днес прожывают Лемкы і де фунґуют православны ци грекокатолицкы парохіі, радістно проходит свято Богоявліня. Єдным з такых сел, де рік-по-рік воду святит ся над ріком, є село Ліщыны на середній Лемковині, де теперішнім настоятельом православной парохіі св. Євангелисты Лукы є о. Андрий Ґрич.

Завдякы спілпрацуючому з нами фотоґрафікови – Петрови Басалыдзі, маме нагоду позерати на фотоґрафіі з Йордану на Лемковині, в Ліщынах. Дякуєме авторови знимок за присланя іх до нашой редакциі.

Христос Крещаєт ся! – Во Йордані!