Ярoслав Мазур лавреатом нагороды за артистычны осягніня і охорону культуры

Мило нам поіформувати, же заприязнений з нашым радийом як і Стоваришыньом Руска Бурса чловек, Ярослав Мазур, достал нагороду Заряду Підкарптского Воєвідства за осягніня в ділині артистычной творчости, розповсяджаня і охороны культуры в тым тіж лемківской.

Ярослав Мазур то народний співак і музык, аніматор культуры, артистычний і музычний кєрівник, журналіста і радийовий редактор, фотоґрафік, як тіж учытель музыкы. Был членом такых народных ансамблів як: Ніва, Раніжовянє, Дзіковянє, Капеля Владислава Поґоды; акомпаніятором і музычным опікуном ансамблів пісні і танця Лесякі, Мале Лесякі, Волянє, Цмолясянє. Є він основательом ансамблю Коцірба якій реконструує народну музыку лясовяків. Занимат ся тіж од технічной стороны реалізацийом награнь платен як тіж опрацуванями фольклористычных музычных спектаклів. В обшыри лемківской культуры зазначыл ся як основатель карпатского музычного тріо Гудаци, якій в своім репертураі містит руснацку музыку, є основательом і кєрівником лемківского реконструкцийного ансамблю Міцне Зіля, а в роках 1999-2003 был кєрівником Лемківского Ансамблю Веретено. Любительско занимат ся фотоґрафуваньом. В своіх знимках найчастійше утырвалят красу Бєщадів, Низкого Бескіду як тіж Сандомєрской Пущы. Робит тіж як журналіста і редактор авдиці, котра пропаґує народну музыку. Його авдицию Вшытко є фольком емітували сме в ефірі нашого радия. Є тіж лавреатом чысленных нагорід і выріжнінь з обшыри музыкы як і фотоґрафікы.

То лем выбраны елементы з обшырной діяльности Ярка. Радийо лем.фм середечні ґратулює нагороды і желат наступных успіхів як тіж силы і вытырвалости в дальшых діянях.