Ян Кльоц найліпшым лікарьом

Оцініня за свої довгорічны професіоналны способности, фаховый і людьскый приступ в одношіню ку паціентам собі перед пару днями перевзяв ортопед, довгорічный прімар і предноста Клінікы ортопедії Факултного шпыталю з поліклініков Яна Адама Раймана в Пряшові, лікарь русиньского походжіня – Ян Кльоц.

Інформовав о тім словацькый денник Korzár. О оцініню Топ лікарь Словакії (Top lekár Slovenska) рішыли самы паціенты посередництвом вебовой сторінкы. Почас цілого рока 2017 могли оціньовати своїх лікарів.

„Тото оцініня про мене много значіть, бо іде о оцініня, о котрім вырішыли паціенты і про лікаря ніт векшого оцініня, як спокійный паціент. Єм радый, же моя професія помагать людям зліпшыти якость їх жывота і маю надію, же мі буде здоровля надалше служыти, жебы-м быв годен надалше помагати паціентам,“ повів Кльоц на марґо свого оцініня про денник.

Ян Кльоц здобыв оцініня Топ лікарь Словакії у фаху ортопедії вже у 2012-ім році. Під його веджіньом ся пряшівска ортопедія зарадила міджі найліпшы в ендопротетіді, а то нелем на Словакії, но і в загранічу.

Хто є Ян Кльоц

Народив ся Ян Кльоц 22-го фебруара 1950-го року в русиньскім селі Тихый Потік (перед тым Штельбах) в окресі Сабінов. Ку свому русиньскому походжіню ся голосить доднесь. У 2009-ім році, коли перевзяв Ціну пряшівского самосправного краю, повів про словацьку державну пресову аґентуру TASR: „Іщі теперь маю жыво в памяти красу і традіції того села, прекрасну природу і неповторятельне чаро русиньской бісіды. Дуже радо ся там вертам. Із своїма родаками як і з паціентами з іншых реґіонів, де жыють Русины, бісідую все по русиньскы. Люблю тот язык.“

Кльоц є выглядаваный фаховець і шпеціаліста головно про оператівны выміны клубів (тотална ендопротеза). По абсолвованю Лікарьской факулты в Мартіні в році 1974 пришов до пряшівского шпыталю, наперед робив як секундарьный лікарь на хірурґії, і од 1976-го року аж доднесь робить на одділіню отопедії. Од 1988-го до 2015-го року быв у функції прімара того одділіня. По выникнутю Клінікы ортопедії став ся їй 1-ый предноста.

Кльоц є актівным в запроваджаню новых діаґностічных і лічебных поступів. В остатніх роках є вдяка Янови Кльоцови пряшівска ортопедія референчным робочім місцьом далшых тіпів ендопротез, і то нелем про протезы бедровых клубів, але і клубів раменных, клубів коліновых і локтьовых.

Жрідло фотоґрафії: www.osteologickecentrum.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА