Ян Фіґель навщівив Закарпатя. Люди споминають на Чехословакію

Як інформує Пресова аґентура Словацькой републікы (TASR), підпредседа Народной рады Словацькой републікы і председа Хрістіаньско-демкоратічного руху (KDH) Ян Фіґель в четверь 13-го авґуста 2015 р. навщівив Закарпатьску область Україны. Приятый быв председом Закарпатьской областной рады Володиміром Чубірком і Михайлом Рівісом. Їднаня дотуляли ся сітуації на Україні і в сусіднім реґіоні Словакії, як і словацько-україньской реґіоналной співпраці.

Представителі обидвох держав окремо бісідовали о процесі придружіня Україны до Европской унії і дослідків сучасного конфлікту на выході Україны. Подля слов Яна Фіґеля є веце як 10-річне членство Словакії в Европскій унії хосенным і є предпокладом і про приблжованя Україны ку зъєдиненій Европі. Представителі были згодны на потребі проглубіня економічной співпраці, головно у области енерґетікы. Україна є вдячна за вытворіня можности додаваня ґазу реверзом зо западу. Фіґель повів, же бы веце про зліпшіня розвитку мали зробити самосправы Пряшівского і Кошыцького Высшого адміністратівного цілку і Закарпатьской области, жебы через хоснованя еврофондів были модернізованы гранічны переходы, транспортна інфраштруктура, но і условії про розвиток черезгранічного бізнісу, турістікы, і културы. Як повів председа KDH Ян Фіґель, люди на обидвох боках граніці памятають собі сполочну історію і споминають на чехословацькы часы.

Ян Фіґель навщівив і єпіскопа русиньской Мукачівской ґрекокатолицькой єпархії преосвященого владыку Мілана (Шашіка). Подля Фіґеля є Україна найвекшым сусідом Словакії, но значіню і потенціалу той державы не зодповідать рівень і россяг словацько-україньскых односин. „Напрік войновому конфлікту на выході державы, є много причін на зінтензівніня співпраці Словакії з Українов,“ повів Фіґель.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА