Як можу помочы Украіні? #помічUA / ч. 4

Скаля гуманітарной кризы на Украіні росне з каждом минутом. Шпыталі не мают одповідніх середків, жебы забезпечыти медичну поміч вшыткым потрібуючым. Довожены сут, м.ін. з Польщы, конвоі з перевязками і середками до забезпечаня воєнных ран. Потребы фурт ся збільшают.

Як помочы? Мож фінансово підперти м.ін. такы орґанізациі:

• Госпіталієры – украіньскій медичный баталийон, якій не єст фінансуваный державом, несе медичну поміч на фронті за кошты жертв самых Украінців, вплат з заграниці ци інчых меценатів.
• Польска Медична Місия – єдна з невельох польскых гуманітарных орґанізаций, яка несе медичну поміч. Сут все там, де потребы сут найвекшы, несут поміч в найвеце потрібуючых державах світа, м.ін. в Сириі ци Венезуели, а тепер урухомили акцию SOS UKRAINA.
• Польскій Центр Медженародной Помочы – Ратункова Ґрупа той орґанізациі была єдном з першых в Польщы, яка несла медичну поміч в рейоні гуманітарной кризы вчас подій на кыівскым майдані в 2014 році, пак провели на Украіні серию школінь для дохторів, ратівників і волонтерів. Ратункова Ґрупа ПЦМП є фінансувана выключні з середків той орґанізациі і добровільных вплат.

Окрем того в векшых містах орґанізуваны сут колекты конкретных лікарств і інчых медикаментів, нп. во Вроцлаві, Варшаві. Додатково, біженці з Украіны можут достати в польскых аптыках необхідны лікарства аж і товды, коли не мают рецепты. В примірі загорозы здоровля пациєнта рецепту може выставити сам фармацевта. Подал так в своім комунікаті Головный Фармацевтичный Інспектор. Незалежні од того, польскы переписы допущают тіж реализувати рецепты выставлены за границьом, тіж поза Евросоюзом.

Медична поміч для біженців на терені Польщы

Каждый громадянин Украіны, котрый пришол до Польщы в звязку з мілітарном аґресийом Росиі на обшыри Украіны, і котырй зголосит ся зо здравотном проблемом до родинного дохторя, специялистичного закладу медичной помочы ци шпыталя, отримат таку поміч. Кошты понесе Нацийональный Фонд Здоровля зо середків буджету державы. Тыкат ся тото вшыткых єдиниц, якы мают підписане догваріня з НФЗ.

Коли до такого місця трафит пациєнт з Украіны, не повинны му одмовити помочы, одослати до інчого місця ци домагати ся заплаты, але мают обовязок евіденцийонувати кажду особу, котрій передана є поміч на основі даных з пашпорту ци інчого реґістрацийного документу (документ подорожы або посвідчыня выдане Граничном Стражом ПР).

Неодплатну поміч для Украінців оферуют тіж некотры приватны медичны компаніі, як нп. Центр Даміяна ци Grupa LuxMed.