Я одтале – Польща вельох народів

Німецкє Освітове Товариство (Deutsche Bildungsgesellschaft) просит на дискусийний панель Я одтале – Польща вельох народів, котрий орґанізуваний єст з нагоды проходячого в минулу суботу Медженародового Дня Материнського Языка. Подія заплянувана єст на ден 5. марця т.р. на 16.00 год. в Народовым Центрі Польской Співанкы в Ополи (Narodowe Centrum Polskiej Piosenki, Opole, ul. Piastowska 14A).

Цілю той стрічы являт ся тема борбы зо стереотипами, якы тыкают ся нацийональных і етнічных меншын та пошырюваня інформаций, як тоты меншыны функцийонуют наштоден в сычасным соспільстві. До модеруваной орґанізаторами бесіды запрошены сут представникы нацийональных і етнічных меншын: караімской, лемківской, жыдівской, німецкой і ромской.

По дебаті присутны будут мати змогу обізрити выставу названу Я одтале – Польща вельох народів і побесідувати з представниками запрошеных меншын.

Вступ на тоту подію єст безплатний, але жебы взяти в ній участ, треба до 2. марця 2015 р. сконтактувати ся з орґанізаторами через е-майль: dbg@vdg.pl, або телефон: (77) 44 19 200.