XIII Стріча Любителів Низкого Бескіду

XIII Стріча Любителів Низкого Бескіду пройде в днях 17.-19. листопада/новембра т.р. в туристичній хыжы «Гайстра» в Поляньскій Гуті. Орґанізаторы, як што рік, запевняют богатий проґрам стрічы.

На пятницю, 17. листопада/новембра, заплянувано показ фільмів повязаных з Низкым Бескідом. Пак буде інтеґрация принимаючых участ в стрічы, значыт неофіцийна част проґраму – будут і бесіды, і спів при ґітарі.

В суботу, 18. листопада/новембра, участників стрічы жде прогулька з провідником, Зеноном Войтасом, працівником Маґурского Нацийонального Парку. Передвидувана долгіст трасы то 15-20 кільометрів.

О год. 16.30 зачне ся серия доповіди та показы сляйдів. Перше Мариюш Скіба оповіст про історию державной поліциі в ґорлицкым і ясєльскым повітах та про контрабанду на обшыри Низкого Бескіду в меджевоєнным періоді. Дальше буде прелекция Томаша Маховского про будуваня лупківского тунелю. О найдрібнійшій шляхті в долині Ославы розповіст Лукаш Байда. Справозданя з діяльности Н.Ґ.К. Маґурич і Стоваришыня Маґурич даст Шымон Моджеєвскій. Пак выклад про мілітарны забыткы на польско-словацкым пограничы буде мал Роберт Банькош, а дальше Данєль Новак про історию поляньской гуты. «Слідами великых лупіжників» то наголовок доповіди Зенона Войтаса, а як послідній выступит Радослав Михальскій, якій повіст про охорону природы нашых гір.

Орґанізаторы рыхтуют на тот ден іщы лжычкарскы варштаты, а вести іх буде Кжыштоф Родак. Дохід з тых варштатів переданий буде на орґанізацию робіт на цмонтери в Незнайовій. На 21.00 год. плянувана єст неофіцийна част в лемківскых климатах.

В неділю пройде закінчыня стрічы та попращаня єй участників.

На тогорічній стрічы буде і ярмак. Охочы взяти участ прошены сут зголошати ся на адрес: spotkanie@beskid-niski.pl. Кошт нічлігу та ідла од пятниці до неділі то 150 зл за ізбу з туристичным стандардом або 190 зл за ізбу з лазничком.

Медияльний патронат над подійом тримат радийо ЛЕМ.фм.