Выставка Односины в русиньскім музею

В Словацькім народнім музею – Музею русиньской културы в Пряшові іщі все проходить выставка творів Штефана Гапака під назвов Поточіна часу, но інштітуція уж приготовлює далшу інтересну вернісаж.

В рамках експозіції Гапака, котру мож видіти вже лем до 30-го авґуста, в середу 26-го авґуста буде о 16.00 год. проходити подія під назвов Медайлон особности Штефана Гапака. Но уж в пятніцю 28-го буде од 17.00 год. проходити вернісаж новой выставкы з назвов Односины, в рамках котрой будуть одпрезентованы творы Владиміра Ґаная.

Молодый умелець в не цалком традічных просторах

Словацькый народный музей – Музей русиньской културы приготовив в може не традічных, розбудованых, в будучности выставных просторах презентацію образів, ґрафік і рисунків молодого пряшівского умелця з русиньскым походжіньом Владиміра Ґаная.

Ґанай закінчів маґістерьскы штудії під веджіньом професора Станіслава Балка на Академії умень в Баньскій Быстріці в Ательєрі класічных малярьскых дісціплін, котрый веде професор Людовіт Голошка. Од 2009-го року выставльовав на колектівных і індівідуалных выставках в Пряшові, Кошыцях, Баньскій Быстріці, Пылзні і Кутній Горі.

Особы і односины як метафора

Молодый умелець хоснує традічны малярьскы жанры, сягать передовшыткым по фіґурах „пропонованых“ інтєрьєровых вырізах і закутинах, при котрых аванґардный приступ Ґаная і концепція переміны видженой реалности созвучіть з тым, што в собі річі, просторы і людьска сполочность скрывать, пише ся в пресовій справі, котру музей ку выставці выдав.

„Намагав єм ся, жебы мої образы были способны нелем провоковати, але і пропоновати рішіня, наприклад вказаньом на то, же вшыткы сьме слабы і чутливы, овпливнительны, але і гіперболізованым проявліньом можливости то звладнути покійным рішіньом, акцептованьом своїх слабостей і властностей, гуморьным сатірічным посміяньом ся над непорозуміньом остатніх і над самым собов,“ повів о выставці автор Владимір Ґанай.

За його словами веце особ на образах є на себе подобных, повторяють ся ґеста ці сітуації. Ґанай творив окремый соціолоґічный репертоар особ з одкрытым внутром. Особы і їх односины суть подля автора сімблочны метафоры людьского порозуміня сучасноти.

Выставку Владиміра Ґаная під назвов Односины кураторьскы приготовила про Музей русиньской културы Даніела Капральова.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА