Выстава родака з Чертіжного у Вігорлатьскім музею

У Вігорлатьскім музею в Гуменнім одбуде ся в четверь 7-го новембра 2024-го року вернісаж выставы під назвов Павел Марковіч – выбер із творчости.

Як за музей інформовала Яна Федічова, выставу присвячену родакови із Чертіжного, Меджілабірьского окресу, зорґанізовали вєдно із партнерами з нагоды сторічніці од його народжіня.

Експозіція буде наіншталована в просторах Ґалерійной салы Ореста Дубая Вігорлатьского музея, і буде єй мож видіти до 8-го децембра того року. Выстава є частьов довгодобого проєкту під назвов Навернутя родаків, в рамках котрого музей представлює художників жыючіх або творячіх в области інтересу Вігорлатьского музея.

Вытварник і педаґоґ Павел Марковіч (19. 11. 1924 р. Чертіжне – 6. 11. 2024 р. Пряшів) записав ся до відома фаховых і лаіцькых кругів як „вынятковый пейзажіста, котрый позорно, аж етноґрафічно захопльовав характерістікы народной архітектуры і цівілізачны переміны сельского оточіня на выходній Словакії,“ пише орґанізатор ку выставі.

„Явным у авторовій творчости, темами і фарбами, є вплив народного русиньского уменя,“ інформує музей, подля котрого повны тоны жовтой, синьой і фіаловой в контрасті з чорныма лінками суть характерістічным вытварным языком Павла Марковіча.

Окрім головных малярьскых технік – пастелу і темперы, Марковіч занимав ся фраґіков, інтарзійов і ілустраціями. Почас творчого періоду зорґанізовав як автор єденадцять особных выстав.

Марковіч діяв як педаґоґ на Педаґоґічній школі в Пряшові, Высшій педаґоґічній школі в Пряшові, а так само быв ведучім Катедры вытварной выховы Педаґоґічной факулты Універзіты Павла Йозефа Шафарика. В рамках його публікачной діятельности вызначныма суть етноґрафічны моноґрафії і намага о выдаваня Народного календаря про Русинів.

В рамках выберу з його творчости буде мож на выставі видіти олій, темперу, сухый пастел, комбіновану техніку і лінорыты. Выставльованы творы выникли меджі роками 1965 – 1983.