Высова погостит ХХХІ Лемківску Творчу Осін

Ближыт ся ХХХІ Лемківска Творча Осін – камеральна подія, яка каждого рока проходит на Лемковині і має за задачу презентацию лемківской авторской творчости. Тогорічна едиция подіі загостит в єдній з нашых курортных місцевости – Высовій.

Подія за традицийом потырват два дни. Тогорічна одбуде ся в суботу і неділю – в днях 7.-8. жолтня/октобра.

Астряб, Буряк, Репела

Лемківску Творчу Осінь орґанізаторы каждого рока присвячают дакій знаній особі з істориі і культуры Лемковины, ци шырше Карпатской Руси.

Тогорічна едиция посвячена буде в першій черзі Матвійови Астрябови. Зато тіж єй першый ден одбуде ся в Высовій, де ся він народил. Был то лемківскій педаґоґ і історик, знаный головні як автор статі «Кôлька слôвъ о лемкôвскôй бесѣдѣ» опубликуваній в 1871 році в львівскій ґазеті «Учитель». В дописі боронил лемківского языка як окремого і незалежного од «малоруской» бесіды. Зато тіж менуваный є в лемківскым дискурсі як аполоґета лемківского языка.

Дальшы округлы річниці, котры будут споминати тогорічны участникы Осени, то 120. річниця народжыня лемківского байкаря Миколая Буряка. Орґанізаторы памятают тіж о Несторі Репелі – лемківскым писеменнику і поеті, якій творил тужливі з далого Донбасу, в його 100. річницю народжыня.

Вчас подіі слово о Матвію Астрябі выголосят др габ. Олена Дуць-Файфер і Петро Трохановскій. Пак о Миколаю Буряку оповіст др габ. Дуць-Файфер, а о Несторі Репелі його єдносельчан (хоц о вельо років молодшый) – Петро Трохановскій.

На тогорічну Осін запрошено творців з Польщы, Словациі і Сербіі. В проґрамі передвиджено і артистичный проґрам. В першый ден выступит діточа ґрупа ансамблю Терочка.

Другій ден подіі одбуде ся в неділю, 8. жолтня/октобра в просторах Руской Бурсы в Ґорлицях. Початок о 15.00 год. Бурсяны просторы своім выступом прикрашат Дария Кузяк і Ольга Стариньска в рамках свойой музичной ремінісценциі «Лемковина-Рим».

Орґанізаторами подіі сут Стоваришыня Лемків і Стоваришыя «Руска Бурса» в Ґорлицях.