Высокопреосвященый Вілъям Скурла скликує Митрополітный собор

Высокопреосвященый Вілъям Скурла, піттсбурзьскый архієпіскоп і митрополіта, голова Митрополітной русиньской ґрекокатолицькой церькви в Споєных штатах Америкы оголосив скликаня Митрополітного собору.

Собор має проходити в днях 16-го аж 20-го юла 2025-го року у Храмі Пречістой Дівы Марії у Вайтінґу, штат Індіана.

Митрополітны церькви свого права (sui iuris) мають подля Кодекса канонів восточный церьквей обовязок скликовати собор найменше раз за пять років. Послідній Митрополітный собор Піттсбурзьской митрополії проходив у 2013-ім році, коли на нім як гость брав участь і владыка Ніл Лущак, помічный єпіскоп Мукачовской єпархії, втогдышній апостольскый адміністратор єпархії.

Митрополія меджі тым дістала нового пармского єпарху, котрым став владыка Роберт Піпта. Так само собі Піттсбурзьска митрополія тот рік припомянула сто років од дня, коли быв Святішым Престолом зрядженый Піттсбурзьскый апостольскый екзархат про Русинів, з чого часом выросла митрополітна церьков.

Тот крок дефінітівно вырішыв вопрос ґрекокатоликів у Споєных штатах, кедь розділив юрідікцію подля того, якой традіції і народности были віруючі. Окрім русиньского екзархату, котрый быв про віруючіх з Карпат – наслідників Ужгородьской унії, выникнув і екзархат про віруючіх з Галичины – Українців, наслідників Берестьской унії, із центром у Філаделфії.

Подля офіціалного писма підписаного кір Вілъямом із 10-го юла 2024-го року, котрым оголошать скликаня собору, уж теперь проходять приготовліня на тоту важну подію, на котрій стрітять ся єпіскопи, священици, монашество і лаіци Піттсбурзьской митрополії.

„Цільом собору є вєдно розрізнити способы, як жыти нашу прославу Хріста днесь досправдовым і практічным способом, а єдночасно учіти ся з минулости, і смотрити до будучности,“ пише Высокопреосвященый Вілъям. В рамках собору будуть проходити формалны презентації, розговоры, панеловы діскусії ці округлы столы.

„Собор є часом на святкованя унікатных вкладів каждого реґіону і єпархії, а єдночасно з тым то є вызнаня єдности Ґрекокатолицькой церькви у Северній Америці.“

Митрополітный собор є порадным орґаном митрополітной церькви sui iuris, котрый митрополітови і Раді єрархів дає рады в ділах векшого значіня, головно апостолату і церьковной дісціпліны. Митрополітный собор веде митрополіта.

Членами суть єпіскопи, представителі священиків, монашества і лаіків. Цілый процес Митрополітного собору рядить ся прінціпами, котры суть записаны в Кодексі канонів восточных церьквей і Штатутом Митрополітного собору. Заключіня собору, по рішіню Рады єрархів, ся мають публіковати в документі, котрый є обовязуючім, жебы служыли далшому розвитку жывота містной церькви.

Фото: Нік Кіта.