Высокопреосвященый Йона став членом Дікастерії про восточны церькви

Пряшівскый архієпіскоп і митрополіта Йона Максим быв призначеный за члена Дікастерії про восточны церькви. У віторок 22-го октобра 2024-го року о тім інформовав Пресовый центер Святішого Престола.

Окрім кір Йоны, котрый моментално бере участь на засіданю Сіноду єпіскопів о сінодалности у Ватікані, Вселеньскый Архієрей – Папа Франціск выменовав веце далшых членів Дікастерії про восточны церькви.

Дікастерія про восточны церькви є єднов із шістьнадцятьох дікастерій Римской курії, котра має задачу старати ся о восточны церькви, якы суть в єдности з Апостольскым Престолом. Была основана в 1917-ім році як Конґреґація про восточны церьвки. Назву змінила на основі апостольской конштітуції Папы Римского Франціска у 2022-ім році. Головов – префектом Дікастерії, є моментално кардінал Клаудіо Ґуджеротті. Асістують му секретарь і підсекретарь.

Окрім того має Дікастерія далшых членів, і то призначеных Папом на 5 років спосеред кардіналів і єпіскопів, і присутных з тітулу свойой функції (по цілій час їй тырваня), значіть вшыткых восточных католицькых патріархів і верьховных архієпіскопів, а презідента Папской рады про єдность хрістіанів. Кір Йона так став членом на 5-річный період.

Дікастерія про восточны церькви в рамках свойой діятельности зряджує різны комісії і комітеты.

Фото: Vatican News.