Высокопреосвященый Йона одсвятковав юбілей

У четверь 21-го новембра 2024-го року, на праздник Входу Пресвятой Богородіці до Храму, одсвятковав Высокопреосвященый Йона Максим, пряшівскый архієпіскоп i митрополіта, жывотный юбілей – 50 років.

Як інформовав Інформачный центер Пряшівской архієпархії, в тот день за участи множества віруючіх, представителів державной справы, духовенства і церьковных єрархів была в Катедралнім соборі святого Йоана Крестителя в Пряшові одслужена дяковна архієрейска літурґія.

Богата участь єпіскопів

На торжестві брали участь высокы церьковны єрархы обидвох католицькых обрядів на Словакії. Участны были апостольскый нунцій на Словакії Нікола Джірасолі, кошыцькый римокатолицькый архієпіскоп і митрополіта а єдночасно председа Конференції єпіскопів Словакії Бернард Бобер вєдно з далшыма римокатолицькыма єпіскопами з конференції, як і ґрекокатолицькы єпіскопи – членове Рады єрархів Пряшівской митрополії.

Вєдно з Высокопреосвященым Йоном служыли літурґію архієпіскоп Кіріл Василь – кошыцькый єпарха, владыка Петро Руснак – братіславскый єпарха, владыка Мілан Лах – помічный єпіскоп Братіславской єпархії, емерітный архієпіскоп і митрополіта Йоан Бабяк, емерітный торонтьскый єпарха Маріян Андрій Пацак як і Преосвященый владыка Ладислав Гучко – апостольскый екзарха в Чеській републіці.

Присутным быв і Петер Мігоч, єпіскоп Выходного діштрікту Євангелицькой церькви авґзбурзьского віроісповіданя на Словакії.

Проповідь тримав архієпіскоп і митрополіта Бернард Бобер, а на кінцю торжества приговорив ся і апостольскый нунцій Нікола Джірасолі. „Краса той Вожеской літурґії є тым найкрасшым і найвысшым выражіньом подякованя і ґратулації владыкови Йонови,“ повів Нунцій, котрый кір Йонови пожелав, жебы і далше жыв із радостьов і надхненьом, роздаваючі тоты дары вшыткым віруючім йому звіреным, як добрый пастырь.

Од імени Рады єрархів приговорив ся архієпіскоп Кіріл Василь, котрый пожелав голові Ґрекокатолицькой церькви на Словакії, жебы помагав звіреным віруючім помагати робити крокы на ступенках віры, жебы і далше як єпіскоп быв „Богоносцьом“, котрый веде людей з любвов до мудрости.

Архієпіскоп нагородив священиків

Святкованя почали уж 20-го новембра, коли была служена літурґія за участи віруючіх і робітників Архієпіскопского уряду, з котрыма мав митрополіта обід. В предвечур праздника Входу Пресвятой Богородіці до Храму служыв кір Йона вечурню вєдно із священиками Пряшівской архієпархії.

При тій нагоді Высокопреосвященый Йона нагородив єденадцять священиків архієпархії за їх довгорічну заслужну роботу званьом ставрофорного протоєрея з правом носити ку тому приналежны інсіґнії. Меджі нагородженыма были Василь Корманик, Антон Мойжіш, Гавриїл Секей, Михал Ондерко ст., Павел Ханат ст., Мірослав Данцак, Павел Данцак ст., Марек Петро, Йосиф Воскар, Франтішек Крайняк і Мірослав Мруґ.

Фото: Ніколас Фечунда.