Вышла друком Інтефийса

Многы нашы чітателі уж може стрітили ся із підкарпатьскым русиньскым порталом Інтерфийса. То некомерційный портал, цільом котрого є шырити новости і назоры, старати ся школовати людей у технолоґіях, хоснуючі русиньскый язык.

Перед роком, кедь портал святковав у януарі три рокы, його основателі – Мигаль Лыжечко, котрого голос уж можуть знати і слухачі радія lem.fm, і Петро Біров, оголосили, же з нагоды основаня сайту рихтують про своїх чітателів парадне святочне друковане выданя, в котрім будуть найліпшы статі, якы были на порталі публікованы. Навеце, же в друкованім выданю чітателі найдуть і ексклузівны матеріалы, котры іщі на вебсайті не были.

Хоць рихтованя друкованой публікації Інтефийса. Убрані статї 2024 тырвало дакус довше, через різны причіны, днесь є вже публікація реалностьов.

Як авторы – редакторы публікації інформовали на своїм порталі, 1-го фебруара 2025-го року одбыла ся презентація друкованой, парпірьовой Інтерфийсы в Ужгородьскій публічній бібліотеці.

На презентації гості мали можность учути накурто од Мигаля і Петра, як ся зачінав проєкт Інтерфийса, як часом перешов із формата вістей у формат довшых статей, якы нюансы повпливали на процес роботы над книгов ітд. На презентації было мож нову книжку і здобыти.

Авторы інформовали, же публікація вышла в тіражи 300 фалатків, із котрых часть піде до бібліотек, часть у выбраных місцях в Ужгороді до продая.

Кедь выникла думка выдати зборник статей із порталу Інтерфийса, мож было електронічно реґістровати ся вшыткым, котры мали інтерес о тоту публікацію. Мигаль Лыжечко і Петро Біров на зареґістрованых не забыли. В найблизшых днях їх будуть контактовати, жебы уточнити детайлы заплачіня і доручіня.