Вытварны діла Василя Чурея в русиньскім музею

Словацькый народный музей – Музей русиньской културы в Пряшові приготовив выставку під назвов Вытварны діла Василя Чурея. Вернісаж выставкы ся одбуде 14-го юла 2016 року о 15. 30 год. в просторах музею. Образы на выставку были пожычены од зберателів ЮДр. Маріана Шмідта, к. н., з Кошыць і Петра Мікулы з Біловежы. Прекрасны країнкы маляря Василя Чурея суть доказом того, же автор выштудовав країномальбу. Навщівників выставкы заінтересує нелем тематіка його кумшту, де переважають селяньскы мотівы в різных частях рока – значіть, на ярь, в літі ці в зимі (Ліс в зимі, Село під берегом, По дорозі домів, Ярный мотів) або деревяна архітектура нашых церьковок у своїм природнім просторі (Країнка з церьквов, По дорозі до церькви, Церьков над ріков, На Богослужбу і многы іншы). Выставка є адресована шырокій громаді і буде одкрыта до 29-го юла того року.

Василь Чурей

Василь Петровіч Чурей народив ся у 1954-ім році на Україні в селі Соль коло Березного. Вытварны основы здобывав при сполочных стрічах з Кашайом у його ательєрі. В роках 1980-1983 штудовав на московскім інштітуті мальбы і ґрафікы. Далшы одборны зналости здобывав на сполочных вытварных пленерах з Кашайом, Коцком, Ґерцом, Микітом, Сапатюком, Кондратовічом і далшыма малярями. Мать за собов дакілько народных выстав і експозіцію в Народнім домі уменя. У 2008-ім році мав самостатну выставу в Кошыцях.