Выстава ікон в Ряшові

В днях 6.-20. вересня минулого рока, в лемківскым селі Новиця, в забудові Братства Грекокатолицкой Молодежы Сарепта, проходила VII едиция Медженародовых Варштатів Іконописців (заявлали сме о ній за тым мотузком). Іх головным мотывом были біблийны притчы.

В варштатах участ взяли іконописці з Польщы, Литвы, Украіны (Львів), Білоруси (Міньск), Ґрузиі (Тбілісі) ріжных віроісповідань (грекокатоликы, католикы, православны). Присвячала ім подібнa ціль – однова іконы як літургічного образу, якій становит важний елемент спільной традициі. Двотыжньовы варштаты были нагодом не лем сотворити іконы, але тіж зосередити ся на тым, што важне, зато было там вельо місця на молитву і бесіды. Варштаты сут рікрічном школом писаня ікона для початкуючых.

На підсумуваню варштатів присутны были м.ін.: бывшый грекокатолицкій перемышльско-варшавскій миторполита о. Йоан Мартиняк, проф. Роман Василик – кєрівник Катедры Сакральной Штукы Львівской Академіі Штукы, віцестароста ґорлицкого повіту Єжы Налепка та полномічний старосты до справ нацийональных меншын Петро Морох.

Поварштатовы выставы презентуваны были в Новици, Креници (в Музею Никыфора), во Львові, в Луцку, в Гродні і во Варшаві, а до 10. січня/януара мож обзерати выставу ікон в Ряшові. Окрем ікон, написаных вчас влонішніх варштатів, обзерати мож і ефекты V Медженародового Пленеру Іконописаня і Сакральной Штукы, якій проходил в Замлиню на Украіні.

Позерайте тіж на свіжопубликуваний фільм Стоваришыня Приятелів Новиці під назвом Новицкы Притчы, якій остал зералізуваний вчас VII Медженародовых Варштатів Іконописців

Орґанізаторами варштатів сут: Стоваришыня Приятелів Новиці, Братство Грекокатолицкой Молодежы Сарепта і Катедра Сакрального Мистецтва AKM во Львові.