Выстава акварели Мариі Янко

14 листопада 2013 рока о годині 18.00 одбуде ся вернісаж выставы акварели Мариі Янко.
Творы презентуваны будут во Фундациі св. Володимиря в Кракові при ул. Канонічій 15.

Марія Янко то артыстка вельох талантів – малює лемківскы писанкы, творит ґрафіку, акварелі, малює на полотні. Робит вытинанкы, лялькы-мотанкы ци соломяны різдвяны палукы.

Окрем того фотоґрафує і пише вершы. Є частым гостьом Лемківской Творчой Осени, імпрезы орґанізуваной перез Стоваришыня Лемків і Стоваришыня Руска Бурса, якой цілью є промуваня і популяризуваня русиньской літерацкой творчости.

Марія Янко вродила ся в селі Дубляны на Украіні. Є членом Фундациі Досліджыня Лемківщыны.
Праці Мариі Янко презентуваны были на понад 50. выставах на Украіні і поза єй границями.