Вышов зборник 20 років высокошкольской русиністікы на Словакії

В днях 17-го аж 19-го октобра 2018-го року Інштітут русиньского языка і културы Пряшівской універзіты в Пряшові із нагоды свого юбілею зорґанізовав конференцію під назвов 20 років высокошкольской русиністікы на Словакії.

В тых днях діставать ся ку інтересуючім ся о тему русиністікы зборник з єднаков назвов, в котрім мож прочітати вшыткы лекції, котры одзвучали на конференції. Публікація, котра має 380 сторінок, і котрой головнов редакторков є Кветослава Копорова, робітникча русиньского інштітуту, выдала Пряшівска універзіта в Пряшові.

Домашні і загранічны авторы

Нова наукова публікація слідує конференцію за їй порядком так як проходила. На зачатку мож прочітати прословы гостів, котры были на конференцію запрошены – представителів Пряшівской універзіты, Міністерства школства, наукы, досліджіня і шпорту Словацькой републікы ці русиньскых орґанізацій.

Далше в зборнику найдеме рефераты із Пленарной секції, Тематічных секцій І, ІІ, ІІІ і Доктрантьской секції, кедьже Інштітут русиньского языка і културы дав на тій конферецнії можливость презентовати ся і молодым надійным науковцям.

В зобрнику мож прочітати лекції од домашніх і загранічных науковців – із Росії, Україны, Мадярьска, Булгарії, Сербії, Німецька і Канады. Рефераты суть публікованы в языках, в котрых были приготовлены на конференцію і в котрых їх было мож выслухати. Значіть, найдеме в нім тексты по русиньскы, словацькы, російскы, україньскы і булгарьскы. Меджі авторами можеме найти окрім науковців зо Словакії такы мена як Михаіл Капраль, Михайло Фейса, Павел Роберт Маґочій, Ахім Рабус, Михаіл Дронов, Костадин Костадинов (автор першой публікації о Русинах в булгарьскім языку) ці Володимір Фенич, но і многы далшы.

Язык, історія і едукація

Зборник лекцій із конференції ку  20-ом рокам высокошкольской русиністікы на Словакії обсягує 19 рефератів науковців і 5 докторандьскых выступів.

Што до тематікы, чітатель найде тексты присвячены різным темам повязаным із русиністіков. Авторы занимають ся языкознательством, історійов, русиньсков едукаційов, но і проблематіков русиньской ідентічности.

Публікація 20 років высокошкольской русиністікы / 20 rokov vysokoškolskej rusinistiky na Slovensku вышла вдяка фінанчній підпорі Фонду на підпору културы народностных меншын. В припаді інтересу мож контактовати Інштітут русиньского языка і културы Пряшівской універзіты в Пряшові.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА