Вышол першый номер «Бесіды» за 2019 рік

Кінцьом лютого/фебруара Стоваришыня Лемків напечатало дальшый номер свого пресового орґану, двомісячника «Бесіда», ч. 1 (166), січен-лютый 2019 р. В найновшым номері мож чытати м.ін.:

• Анна Рыдзанич, Лемківскій патріота – річ о отцю Димитрию Хыляку;
• Даміан Трохановскій, О Лемківскій Республиці в ґорлицкым ліцею;
• Севериян Косовскій, Централя ЛЕМ.фм розсвітлена – про світльну ілюмінацию на будинку Руской Бурсы;
• Mирослав Воргач, Стріча з лекцийом лемківского языка в Радваницях;
• Мирослав Воргач, Стріча з історийом в Михалові; 
• Петро Трохановскій, …і памят Іх в род і род – 100-літя Республикы;
• Андрий Трохановскій, Ластівочка концертувала в Турциі – репортаж; 
• Петро Трохановскій, Ци недалеко то заправды недалеко – серия National Geographic або Подорожы Лемків;
• Володимир Ключак, Од Мурянки для Лемковини – передрук статі з Трускавецького Вісника.

Окрем выміненых статий в номері найдете традицийно інформациі про найважнійшы подіі з русиньской обшыри. При нагоді реляциі з упамятнінь 100. річниці фльориньского віче в ґазеті поміщено одмовну одповід з Інституту Нацийональной Памяти на вопрос одкрыти пропамятну таблицю во Фльоринці. Явил ся і коментар в тій справі шефредактора П. Трохановского. Редакция «Бесіды» опубликувала споминове слово на бл. п. Анну Дрейович.

Во вступі до номеру нашла ся важна увага про послідні кодифікацийны зміны в лемківскым языку. Редакция припомнула, што в маю і червци/юнію мунулого рока в просторах Ягайлоньского Університету в Кракові проходили кодифікацийны стрічы языкознавців, творвіц і журналистів, цілю якых было ввести коректу до правопису лемківского языка. Дальше редакция пояснят, што в деякых текстах од выбраных авторів являт ся новый правопис, м.ін. кінцівка – ЫЙ в придавниках. Як чытаме во вступі, такій правопис обовязувал в передвоєнных выданях «Лемка», ци тіж обовязує на Пряшівскій і Підкарпатскій Руси. «Бесіда» пояснила, што загальні іщы не приняла даных постанов, понеже не были они офіцийні, повселюдні оголошены, але высловила погляд, што і в однесіню до часопису – то лем квестия часу.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 08.00-16.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.