Выклад проф. Ахіма Рабуса о русиньскым языку в краківскым ІПЯ ПАН

20. марця т.р. в краківскым Інституті Польского Языка Польской Академіі Наук (ал. Міцкєвича 31, Краків) буде проходил выклад проф. Ахіма Рабуса на тему Compiling a Corpus of Spoken Rusyn: Why and How? (Опрацуваня корпусу бесідуваного русиньского языка: чом і як?).

Проф. А. Рабус оповіст о проєкті досліджуючым русиньскій язык, котрого частю єст опрацуваня корпусу бесідуваного русиньского языка. Выклад буде обнимал выбраны проблемы, являючы ся при аналізі награного материялу, тыкаючы ся корпусу зложеного з поєдных форм русиньского языка.

Проф. Ахім Рабус студиювал славістыку, музыколоґію та орґанізацию і заряджаня в Фрайбурґу (Німці), Базіль (Швейцария) і Казані (Росия). Од 2013 єст професором славяньского языкознавства на Університеті ім. Фрідріха Шілера в Єні (Німці). Обшыри дослідничых заінтересувань проф. А. Рабуса то: славістычна лінґвістыка і социйолінґвістыка, язык і культура Ріпосполитой Обох Народів, славістыка і електронічны медиі та меншыновы языкы в Польщы і інчых державах.