Выізд на гріб о. Димитрия Хыляка – священника і лемківского патріоты

Православна парафія Воскресіня Христового в Ліґници в днях 19.-21. жолтня (октобра) т.р. орґанізує выізд на Украіну з нагоды приближаючой ся 60. річниці смерти о. Димитрия Хыляка.

Екскурсия выіхат в понедільок рано (19.10), плянуваны сут два нічлігы в Золочеві, по дорозі – короткє звиджыня Почаівской Лавры. Поворот з Украіны – в середу вечер (21.10).

В Золочеві, на тамтышнім цмонтері, де спочыват о. Димитрий Хыляк, буде одслужена панахіда і буде зложене квітя в подяці за жытя того великого священника і русиньского патріоты.

Жебы записати ся на выізд, або достати детальнійшы інформациі, орґанізаторы просят о контакт на номер: 76 86 261 82 (о. Любомир Воргач), або через електронічну почту: orthodox.leg@gmail.com. 

Чысло місц ограничене!

О. Димитрий Хылях вродил ся 21. жолтня (октобра) 1865 р. в Білцаревій, на західній Лемковині. По отриманю богословской освіты і рукоположыню, остал направлений в родинны стороны на парафію Кункова-Ліщыны-Білянка. Служыл гын до 1901 р. Пак перенесий был до Ізб, де служыл до выгнаня в 1947 р. В 1928 р. з цілом ізбяньском громадом повернул до православя.

Вчас І Світовой Войны, коли твердых Русинів ждали переслідуваня, о. Димитрий Хыляк был вязнений в першым концентацийным лаґрі в Европі – Талергофі. Коли утверджений в своіх поглядах вернул в родинны стороны, брал участ в творіню лемківской державности, котрой початком было віче з 5. грудня 1918 р. во Флоринці. 12. марця 1920 р. враз з інчыма діячами з Лемковины вошол до уряду Руской Народной Республикы Лемків –Верховной Рады Лемківской Руси (в котрій занимал становиско Міністра Внутрішніх Справ), за што потім был оскаржений о здраду стану через польскы власти. Горозила му кара смерти, на щестя, разом з інчыма оскраженыма остал уневиннений.

В 1947 році, як каждий Лемко, был безправні выганий в рамках Акциі «Вісла» на західні землі Польщы. На чужыні од самого початку старал ся нести душпастырску послугу медже выселеныма краянами. Під конец 1953 р., на осін свого жытя, выіхал до дівкы на Радяньску Украіну. О. Димитрий Хыляк прожываючы без єдного дня 90 років, вмер 20. жолтня (октобра) 1955 р.