Выголошіня Общества приятелів Підкарпатьской Руси

Общество приятелів Підкарпатьской Руси (Společnost přátel Podkarpatské Rusi) як представитель Русиньской народностной меншыны в Чеській републіці смотрить зо страханьом на вывой на сучасній Україні. Актівности Російской федерації суть із погляду міджінародного права неприятельны. На другім боці але треба взяти в увагу недотримованя прав корінных жытелів теріторії днешньой Закарпатьской области (особливо Русинів) сучаснов Українов (самособов і Совєтьскым союзом в минолости). Іде головно о права свободно приголосити ся ід своїй народности і право на навчаня в русиньскім языку.

Общество приятелів Підкарпатьской Руси зато апелує на владу, презідента і далшы державны орґаны Чеськой републікы, жебы коло їднань із представителями Україньской републікы (припадно представителями третіх держав на міджінародных форумах) підпоровала Чехія оправнены пожадавкы корінных жытелів сучасной Закарпатьской области Україны:

• Русины (єднако як і далшы корінны народы Закарпатьской области Україны) мають право на вызнаня свого языка і право учіти ся у своїм языку на державных школах.
• Русины і далшы корінны народы мають право на вызнаня свойой народности. Мусять мати можливость ід своїй народности свободно ся приголости при каждій пристойній нагоді (перепис населеня і под.)
• Русины і далшы корінны народы мусять мати право самы собі вырішовати справы котры належать до области културы, навчаня і под. Тото право бы мало быти залучене в законах і мало бы быти репрезентоване властныма свободно зволеныма автономныма орґанами.

Жадне із высше спомянутых основных прав і свобод не є на сучасній Україні державныма орґанами повні дотримоване і хосноване. Право сучасной теріторії Закарпатьской области Україны (історічно Підкарпатьской Руси) на властне самосправованя є залучене вже в міджінароднім договорі зо дня 10-го септембра 1919 р. в Сен-Жермен-ан-Ле. Жытельство Закарпатьской области пожадавкы на автономну позіцію выразило таксамо в референдумі, котре проходило в 1991 р.

Україна в сучасній добі проходить великыма змінами. Вопросом є, ці з них выйде посилнена, або навспак. Выслуханы бы але мали быти вшыткы народы і народности.

Представителям Чеськой републікы припоминаме, же заникнута Чехословакія підписала высше спомянутый договор в Сен-Жермен-ан-Ле. Підкарпатьска Русь бы так з погляду Чеськой републікы не мала быти незнамов і без значіня. Общество приятелів Підкарпатьской Руси таксамо припоминать, же Чеська републіка за веце як двадцять років не была способна на теріторії Підкарпатьской Руси одкрыти конзулат ани чеськый културный центер.

Протлумачів: Петро Медвідь