Выгнаны з раю. Kонцерт Галины Баранкєвич

Галина Баранкєвич, артистка творяча в Украіні, коріня якой выходят з західньой Лемковины, 9. листопада/новембра т.р. представит свій новий проєкт. То музычно-драматичне выдовиско, головном темом якого буде лемківска культура, спів і музыка. Припомнена і буде драматична істория періоду выселінь. Наголовок ґальового концерту то «Выгнаны з Раю». 

Концерт зачне ся о 19.00 год. в просторах Театру ім. Івана Франка в Івано-Франківску. Тоты пісні то штоси веце як прекрасны мелодиі та проникливы слова – то звукы втраченого раю, «обіцяной» землі, яка стала леґендом і мрійом… Тоты пісні – духовна «планета» народу, і ступившы на ню, познаєте ю, познаєте себе… – чытаме в анонсі про драма-концерт івано-франківского театру.

В особливым проєкті Галины Баранкєвич, акторкы та співачкы, будут вказаны поєднаы драматичны істориі люди, якы были переселены та выгнаны з Лемковины. Лемкы, якы перше в добровільно-примусовий спосіб были вывожены на Радяньску Украіну, а пак в результаті акциі Вісла выгнаны з рідных хыж, втратили не лем материяльне богатство, але головно культурове. Іх доля в тот ден вызвучыт предовшыткым в лемківскых піснях, якы найміцнійше оддают духа тых смутных подій. Концерт пройде за участи лемківской хоровой капелі Бескид.

Вчас концертового вечера Галина Баранкєвич перший раз в шыршым вымірі запрезентує свою платню «Выгнаны з Раю», яка є выразом лемківской душы співачкы. То як раз музыка і спів мают одгрывати головну роль вчас драма-концерту. 

Артистка по роді з Верховні 

Галина Баранкєвич, хоц іщы в молодым віку, має уж мено заслуженой артисткы Украіны. Єй коріня выходят з Верховні (Вірхомля Велика), што находит ся на західній Лемковині. Є акторком івано-франківского музычно-драматичного Театру ім. Івана Франка, а при тым незалежном артистком-співачком, котра в своій творчости проявлят лемківскы мотивы. В 2015 році выдала платню пн. «Выгнаны з Раю», на якій находят ся пісні в лемківскым языку. Серед них сут так патріотичны творы, як і просты народны співанкы. То як раз наголовок компакт-диску, інспiруваний змістом ориґінальных лемківскых пісен, послужыл як головна тема листопадового драма-концерту.

Осіню 2013 рока артистка перебывала в рідным селі в рамках проходячой там ХХІ Лемківской Творчой Осени, яка была товды присвячена памяти народженого в Верховни русиньского писменника –  Владимира Хыляка. Так в перший ден Осени, як і в другій, в Рускій Бурсі, артистка выступувала з репертуаром лемківскых пісен.

Была гостьом радия ЛЕМ.фм в проґрамі «70%».